Meza PN baixa proposta Lei Siberseguransa ba Komisaun A hodi fó pareser
DILI, 18 Agostu 2026 (TATOLI)-Meza Parlamentu Nasionál (PN) baixa ona proposta Lei Siberseguransa ba Komisaun A ne’ebé trata Asuntu Konstitusionál no Justisa hodi fó ninia pareser.
Prezidente Komisaun A, Natalino dos Santos, hatete Komisaun simu ona despaxu husi Prezidente Parlamentu, Maria Fernanda Lay, no mós iha nota admisibilidade husi Divizaun Inisiativa Parlamentár no Lejizlasaun (DIPLN) hodi bele fó prosesu segimentu ba proposta Governu hodi husu autorizasaun lejizlativa ba pakote lei ne’e.
“Tanba ne’e, maski iha resesu, hanesan responsavel ba Komisaun, mai orienta hela tékniku legál ho asesór sira atu prepara hela pareser téknika, depois resesu tama sei halo ajendamentu audiénsia públika ho entidade relevante”, nia hateten ba Tatoli, iha Parlamentu, ohin.
Hafoin ne’e, Komisaun nia relatóriu no pareser sei aprezenta ba plenária ne’ebé iha kompetésia atu deside hodi fó autorizasaun.
Komisaun fó prioridade diskusaun ba inisitiva ne’e, tanba lejizlasaun ne’e importante rebes nu’udar asuntu Estadu nian no iha responsabilidade tenke ajusta-an hodi kompleta enkuadramentu legál sira atu proteje Estadu ne’e.
Ba Komisaun, lejizlasaun ne’e pertinente ba prosesu transformasaun dijitál no seguransa iha setór dijitál nian, no atu kombate preokupasaun kona-ba kazu scame online ne’ebé daudaun buras iha Timor-Leste.
Tuir deputadu, kestaun ne’e séria hanesan hanesan país joven no sai ona membru Asosiasaun Nasaun Sudeste Aziátiku (ASEAN, sigla inglés) presiza tau atensaun. Nune’e, agora Governu dezmantela ona fatin lubun ba atividade ilegál ne’e no prosesa autór sira.
“Ida-ne’e séria duni no Governu aprezenta inisiativa ne’e atu reforsa tan Estadu kria iha tan lei sira hodi hatudu ita iha seriedade duni hakarak halo kombate”, dehan.
Lei sira ne’e importante ba investidór sira husi rai-li’ur atu investe, tanba presiza protesaun seguransa jurídika ho nia sistema.
Notísia relevante: FRETILIN konsidera Lei Siberseguransa pertinente ba kombate scame online
Jornalista: Nelson de Sousa
Editora: Maria Auxiliadora
