PAM Vikeke husu juventude kontinua banati tuir FALINTIL
BAUKAU, 18 Agostu 2026 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, husu juventude atu kontinua banati tuir Forsa Armada Libertasaun Nasionál Timor-Leste (FALINTIL) ne’ebé liberta ona nasaun husi kolonializmu.
“Husu ita hotu ne’ebé moris hela atu luta hamutuk liberta povu husi ki’ak no mukit,” PAM Vikeke informa ba TATOLI hafoin partisipa misa agradesimentu Loron FALINTIL iha Igreja Pro Katedrál Vila Antiga, Baukau, Tersa ne’e.
Notísia relevante: Falur konsidera Selebrasaun Loron FALINTIL ba da-51 reafirma juramentu
Líder Vikeke ne’e relata dezde inísiu ezisténsia FALINTIL ho baze natureza nu’udár na’in ba Estadu nune’e liuhusi selebrasaun tinan 51 nafatin sai mahon no matadalan ba país Timor-Leste.
Aleinde ne’e, husu membru FALINTIL-FDTL kontinua banati tuir gerrilleiru-FALINTIL sira-nia luta hanesan konsolida forsa liuliu hametin espíritu nasionalizmu nune’e garante soberania Timor-Leste iha futuru.
“Ita-nia esperansa jerasaun kontinuadora iha FALINTILl-FDTL kontinua hametin pás no estabilidade iha Timor-Leste,” Francisco Soares hateten.
Entretantu, selebrasaun misa agradesimentu Loron FALINTIL ba da-51 realiza baziea ba tema jerál “Onra ba Mártir, Kompromisiu ba Estabilidade no Pás” no partisipa iha misa ne’e kompostu husi Xefe Estadu Maiór Jenerál F-FDTL, Tenente Jenerál Falur Rate Laek, Xefe Estadu Maiór FALINTIL-FDTL, Brigadeiru Jenerál José da Costa ‘Trix, Eis Ministru Defeza, Filomeno Paixão, Ministra Edukasaun, Dulce de Jesus, Prezidente Autoridade Munisipál Baukau, Veneranda Eurico Lemos Martins, PAM Vikeke, Superiór PNTL, Membru F-FDTL, estudante no komunidade.
Serimónia nasionál FALINTIL ba da-51 sei realiza iha Foho Matebian, área Sobasula, Suku Abu, Postu Administrativu Matebian iha-ne’ebé sei realiza ho isár bandeira iha loron Kinta ((20/08/2026).
Jornalista: Natalino Belo
Editór: Xisto Freitas da Piedade
