Tribunál Konta fó vistu atu hahú konstrusaun ba Merkadu Modernu Munisipál Lautein
DILI, 18 Agostu 2026 (TATOLI) – Ministru Komérsiu no Indústria, Filipus Nino Pereira, informa katak Tribunál Konta fó ona vistu ba empreza Divita Co. Unipessoal Lda., atu hahú konstrusaun ba Merkadu Modernu Munisipál Lautein.
“Ami simu ona karta ida husi Tribunál Konta relasiona ho vistu ba kompañia ne’ebé atu halo konstrusaun ba Merkadu Modernu Lautein. Ita planu sei halo lansamentu iha 28 Agostu tinan ne’e”, Nino Pereira hatete ba Tatoli, ohin.
Nia subliña katak importante tebes konstrui merkadu, tanba supervizaun ba konstrusaun Merkadu foun Munisipál Lautein halo ona iha tinan kotuk, ne’ebé kaer husi empreza PT. Kanta Karya Utama (Indonézia) konsfórsiu ho Jenetbu Gumer Unipessoal Lda., totál orsamentu rihun $450.
Ba konstrusaun Merkadu Modernu Munisipál Lautein Governu kontra empreza ho totál orsamentu $7.163.904,08.
Atu harii Merkadu Modernu Munisipál ne’e, Governu planu antes ona, liuliu iha munisípiu Ermera no Baukau ne’ebé la’o ona iha fulan kotuk ba, no Lautein foin mak atu lansa, tanba prosesu aprovizinamentu hotu tenke hein Tribunál Konta fó vistu mak foin bele hahú konstrusaun.
Lembra katak, iha loron 06 Fevereiru 2026, Governu lansa ona fatuk dahuluk ba konstrusaun Merkadu Modernu Munisipál Ermera, ne’ebé responsabiliza husi empreza Henan Fifth Construction Group Co., Ltd., husi Xina, ho totál orsamentu $8.861.517,89 no durasaun tempu tinan ida ho balun ka fulan 19.
Nune’e, iha loron 12 Fevereiru 2026, Governu kontinua lansa fatuk dahuluk ba konstrusaun Merkadu Modernu Munisipál Baukau, ne’ebé kaer husi empreza rua mak Fujian Yongtai Construction Group. Co, Ltd., joint venture ho Suhurama Developer Unipessoal Lda., ho totál orsamentu tokon $7-resin no durasaun konstrusaun tinan rua.
Objetivu husi ezisténsia merkadu sira ne’e mak nu’udar dalan ida atu reforsa ekonomia lokál.
Notísia relevante: MKI halo estudu ba rai hodi prepara ba konstrusaun Merkadu Munisipál Bobonaru
Jornalista: Arminda Fonseca
Editora: Maria Auxiliadora
