BOBONARU, 14 Fevereiru 2026 (TATOLI) – Ekipa husi Ministériu Komérsiu no Indústria (MKI) hamutuk ho Autoridade Munisipál Bobonaru no konsultór sira halo estudu ba rai hodi prepara dezeñu ba konstrusaun Merkadu Modernu Munisipál Bobonaru.
Teste ba rai ne’e halo ho objetivu mak atu determina nia kapasidade, karaterístika mekániku, no estrutura kamada rai nian iha fatin konstrusaun. Dadus ida-ne’e krusiál atu determina tipu fundasaun seguru sira (ezemplu, kle’an ka kle’an), evita falla estruturál, optimiza kustu dezeñu nian, no garante seguransa edifísiu nian ba tempu naruk.
Notísia relevante: Governu reforsa ekonomia lokál ho lansamentu fatuk ba Merkadu Munisipál Ermera
“Ami ho konsultan husi Ministériu Komérsiu Indústria nia mai para halo teste rai ba merkadu Maliana nian, depois halo levatamentu dadus hodi hein prosesu sira tuirmai atu halo konstrusaun”, Diretór Delegasaun Territoriál MKI Munisípiu Bobonaru, Domingos Mau, informa ba Tatoli, ohin.
Nia dehan iha posibilidade prosesu konstrusaun ba Merkadu Modernu Munisipál Bobonaru bele realiza iha tinan oin.
Administradór Postu Administrativu Maliana, Augusto Caetano, husu ba komunidade, liuliu negosiante sira atu koopera ho Governu no konsultór, nune’e prosesu hotu bele finaliza ho di’ak.
“Presiza tebes ita-boot sira-nia apoia para ita-nia merkadu ne’e, tinan oin hanesan ne’e, bele halo ona. Ita hotu hakarak no hein obra ida-ne’e atu mai, tanba merkadu ne’e modernu, sei prepara fatin dignu ba ita hotu”, nia sujere.
Merkadu munisipál ne’e sai hanesan infrastrutura estratéjika ida neʼebé importante hodi fortalese ekonomia lokál, liuliu ba setór agrikultura no komérsiu.
Iha tinan ne’e, liuhusi Orsamentu Planu Dezenvolvimentu Integradu Munisipál (PDIM) ho valór rihun $294, Autoridade Bobonaru mós sei kompleta infraestrutura balun iha merkadu Mau-Mali hodi bele fasilita atividade negosiante sira. Aleinde ne’e, sei konstrui mós merkadu iha postu administrativu Loloto’e ho totál kustu rihun $150.
Rekorde katak Governu halo ona lansamentu fatuk dahuluk ba projetu konstrusaun Merkadu Modenu Munisipál Ermera no Baukau.
Notísia relevante: Governu lansa fatuk dahuluk ba konstrusaun Merkadu Modernu Munisipál Baukau
Jornalista: Sergio da Cruz
Editora: Maria Auxiliadora
