INETL kontinua rejista inflasaun 0,2% iha fulan-Jullu
DILI, 19 Agostu 2026 (TATOLI) – Institutu Nasionál Estratístika Timor-Leste (INETL) nafatin rejista inflasaun 0,2% ba Indise Presu Konsumidór (IPK) iha Jullu 2026, kompara ho Juñu, 2026 mós hanesan 0,2%.
Tuir dokumentu INETL, mudansa presu grupu hotu sa’e 0,2%, tanba hetan kontribuisaun husi grupu hahán no bebida la’os alkólika sa’e 0,3%, hatais no sapatu 0,8% no ekipamentu no manutensaun mobiláriu uma-laran 0,2%.
Nune’e, grupu transporte tun 0,3% no uma 0,2%, ne’ebé sai hanesan mudansa kontráriu ba inflasaun mensál grupu hotu.
“Grupu hahán no bebida la’ós alkólika sa’e 0,3% tanba hetan impaktu maioria husi subgrupu modo-tahan 3,0%, mina no bokur 0,4%, naan 0,5% no ai-fuan 0,1%”, refere dokumentu ne’e.
Nune’e, subgrupu foos tun 1,3%, masin-midar, marmelada, bani-been, xokolate no hahán midar tun 1,5%, susubeen, keiju no manu-tolun tun 0,5% no bee, bebida jus ai-fuan no modo-tahan 0,9%, sai hanesan mudansa kontráriu ba inflasaun grupu hahán no bebida la’os alkólika ba Jullu 2026.
Nota ne’e hatete katak mudansa persentajen IPK anuál sa’e 0,5%, kompara entre fulan-Jullu, 2026 no Jullu 2025, hetan kontribuisaun husi grupu hahán no bebida la’ós alkólika sa’e 0,4% transporte 6,3%, edukasaun 0,3%, hatais no sapatu 1,1%, uma 0,3% no komunikasaun 0,3% ba anuál Jullu 2026.
Ba grupu alkol no tabaku tun 0,7%, ekipamentu manutensaun mobiláriu uma-laran 1,5%, no rekreasaun kultura 0,6%, ida-ne’e sai hanesan mudansa kontráriu ba inflasaun grupu hotu iha anuál Jullu 2026.
Nune’e, inflasaun tradeable sa’e 0,5% no non-tradeable tun 0,5% iha mensál, kompara entre Jullu 2026 no Juñu 2026. Inflasaun tradeable sa’e 0,5% no non-tradeable mós sa’e 0,3% iha anuál, kompara entre Jullu 2026 no Jullu 2025.
Notísia relevante: Juñu rejista inflasaun 0,2%
TATOLI
