Komandu F-FDTL realiza marsa iha Foho-Matebian
DILI, 19 Agostu 2026 (TATOLI)–Komandu FALINTIL-Forsa Defeza Timor-Leste (F-FDTL) hamutuk ho Forsa Armada husi nasaun seluk, komunidade lokál, estudante no veteranu sira, Kuarta ne’e, realiza marsa iha Foho-Matebian, Postu Administrativu Kelikai, Munisípiu Baukau hodi fó onra no glória ba martir sira ne’ebé luta ba libertasaun kontra okupasaun.
Atividade ne’ebé lidera husi Xefe Estadu Maiór F-FDTL, Brigadeiru-Jenerál José da Costa Soares ‘Trix’, hahú ho sesaun isar Bandeira.
Marsa ne’e partisipa mós husi Xefe Estadu Maiór Jenerál F-FDTL, Tenente-Jenerál Domingos Raul ‘Falur Rate Laek’, Ministra Edukasaun, Dulce de Jesus, Prezidente Autoridade Munisípiu Baukau, Venderanda Lemos, inklui entidade relevante seluk.
Biban ne’e, Brigadeiru-Jenerál José da Costa Soares “Trix” konsidera atividade ne’e nu’udar jestu ida atu valoriza luta, sofrimentu, mataben no mate durante luta iha Foho-Matebian tutun.
“Fatin ida-ne’e mak uluk ita-nia maluk sira lakon mai ne’e, subar iha ne’e dalaruma morteiru no kañaun rega mate iha ne’e, balun to’o kuru bee no buka hahán iha kraik ne’e lori sae ba hodi sobrevive. No ohin ita hakarak fó onra ba ida-ne’e, nune’e ita halo marsa mai iha foho tutun Matebian,” Trix hato’o ba Ajénsia TATOLI iha Foho-Matebian, Kuarta ne’e.
Notísia relevante : Estudante Hadomi Natureza sei halo marsa FALINTIL husi Vikeke bá Foho-Matebian
Nia hatutan, marsa ne’e mós hodi relembra jerasaun foun sira atu nafatin kuda espíritu patriotizmu no nasionalizmu, katak luta ba ukun-an ne’e la fásil.
“Marsa ida-ne’e sei ba vizita fatin uluk morteiru no kañaun ne’ebé hamate ema na’in-100 husi Uaibobo iha rai kuak ida. Ita sei sei sunu lilin iha ne’ebá,” nia akresenta.
Komandante Trix mós relata sekuénsia iha ámbitu komemorasaun loron FALINTIL ba dala-51 iha Foho Matebian ne’e mak hanesan, ohin hahú ho marsa iha Foho-Matebian, molok fila husi ne’ebá sei iha orasaun ne’ebé dirije husi Kapitaun Rui no fila husi ne’e sei han hamutuk iha fatin serimónia isar Bandeira nian.
Ho nune’e, iha tuku 19:00 Komisaun Organizadora sei organiza serimónia kulturál, nune’e bele garante pás no estabilidade nafatin, hafoin ida-ne’e sei loke filmajen FALINTIL nia luta hodi relembra partisipante marsa kona-ba FALINTIL nia kondisaun uluk kontra okupasaun sira to’o transforma ba F-FDTL hanesan forsa profosionál.
Jornalista : Natalino Costa
Editora : Julia Chatarina
