PD apoia medida Governu hasoru kazu scam online
DILI, 19 Agostu 2026 (TATOLI)-Xefe bankada Partidu Demokrátiku (PD), Manuel Henrique Noronha, hateten Governu ho autoridade relevante iha seriedade hodi kombate kazu scame online iha Timor-Leste.
Tanba ne’e, halo esforsu hodi deteta atividade ilegál no dezmantela fatin lubun, nomós prosesa autór barak ba iha autoridade judisiál.
Deputadu ne’e husu atu implementa medida adekuada no kontinua halo investigasaun kle’an hodi prosesa autór sira to’o hetan desizaun finál husi Tribunál.
Nia mós apoia inisiativa husi parte Ezekutivu nian ne’ebé submete ona proposta Lei Siberseguransa ba Parlamentu Nasionál, ne’ebé husu autorizasaun lejizlativa hodi aprova pakote lei integradu ida kona-ba siberseguransa, ne’ebé kobre krime no prosesu kriminál sira iha ámbitu dijitál no definisaun rejime jurídiku siberespasu nasionál.
Tuir Manuel Henrique, lei ida-ne’e importante tebes ba prosesu transformasaun dijitál no seguransa iha setór dijitál nian, liuliu atu kombate kazu scame online ne’ebé daudaun sai preokupasaun.
“Ne’e hatudu Governu sériu duni. Lei ne’e importante tebes, tenke implementa duni hodi asegura nasaun ba futuru bele di’ak”, nia hatete.
Timor-Leste adota merkadu livre, tanba ne’e deputadu konsidera frajilidade iha kontrolu no bele fó fatin ba atividade sira ne’e hala’o. Maibé, hanesan nasaun joven hahú foti medida sira hasoru no nia rekomenda ba Governu presiza reforsa kontrolu no koordenasaun entre instituisaun relevante sira.
Notísia relevante: Embaixada Indonézia louva asaun Governu hodi kombate rede scam online
Jornalista: Nelson de Sousa
Editora: Maria Auxiliadora
