STAE Kovalima seidauk desloka bá postu administrativu atende eleitór sira
KOVALIMA, 18 Agostu 2026 (TATOLI) – Sekretariadu Tékniku Administrasaun Eleitorál (STAE) Munisípiu Kovalima, seidauk halo atendimentu ba sidadaun sira iha postu administrativu sira atu hasai no atualiza kartaun eleitorál biométriku, tanba sei hein ekipamentu no materiál husi STAE Nasionál.
“Ami seidauk halo atendimentu ba eleitór sira ne’ebé hakarak atualiza kartaun eleitorál biométriku no sidadaun sira ho idade 16-17 ne’ebé hakarak hasai kartaun eleitorál foun, tanba ami sei hein materiál sira ne’ebé sei transporta husi nasionál mai iha munisípiu,” Diretór STAE munisipál Kovalima, João Tilman hateten ba jornalista sira iha Edifísiu STAE Kovalima.
Nia esplika to’o agora seidauk iha data klaru kona-ba bainhira STAE Kovalima bele hahú atendimentu iha postu administrativu sira, tanba materiál sira foin to’o iha postu administrativu rua, enkuantu postu administrativu sira seluk seidauk simu.
Materiál ne’ebé presiza transporta ba postu administrativu sira, entre sira mak Laptop, printer, transfer film, tinta, ribbon no blanku kartaun eleitorál, ne’ebé sei uza tuir nesesidade atendimentu ba eleitór sira.
Bazeia ba dadus STAE Kovalima, durante atendimentu normal, ekipa STAE bele atende eleitór sira ne’ebé hakarak hasai ka atualiza kartaun eleitorál, ho númeru mínimu 50 no másimu 100 ema kada loron.
Dadus STAE hatudu katak, to’o agora sidadaun ho idade 16-17 tinan ne’ebé hasai kartaun eleitorál hamutuk 2.656, kompostu husi mane 1.283 no feto 1.373.
Enkuantu eleitór sira ne’ebé halo atualizasaun ba sira-nia dadus eleitorál hamutuk 19.547, kompostu husi mane 9.469 no feto 10.078.
João Tilman mós hateten katak, durante prosesu atendimentu, STAE Kovalima hasoru dezafiu, liuliu kona-ba fornese tinta no ribbon husi STAE Nasionál ne’ebé limitadu.
“Bainhira ekipamentu to’o ne’e ami simu husi nasionál limitadu, ami bele halo impresaun ba kartaun eleitorál 750 de’it. Bainhira materiál sira ne’e hotu, ami tenke submete proposta fali atu husu materiál tan hodi bele kontinua impresaun,” nia hateten.
Nia hatutan katak, bainhira tinta no ribbon hotu, STAE Kovalima nafatin kontinua atendimentu ba eleitór sira liuhusi rejistu sira-nia naran no dadus iha sistema.
Jornalista:Celestina Teles
Editór: Florenco Miranda Ximenes.
