Xina kompromete nafatin apoia Timor-Leste iha área defeza no seguransa
DILI, 19 Agostu 2026 (TATOLI) – Ministru Defeza interinu, atuál Primeiru-Ministru, Xanana Gusmão, hala’o enkontru kortezia ho Ministru Defeza Nasionál Xina, Dong Jun, iha, Fatuhada, Dili, hodi aborda kooperasaun iha área defeza no seguransa nian.
Durante enkontru, Xina komprometidu nafatin apoia Timor-Leste iha área defeza no seguransa.
Vise-Xefe-Estadu-Maiór Jenerál FALINTIL-Forsa Defeza Timor-Leste (F-FDTL), Calistro dos Santos Coli “Coliati, hatete sorumtu ne’e toka liu ba asuntu defeza no seguransa, liuliu kona-ba kooperasaun sira ne’ebé balun hala’o ona no presiza atu halo.
“Xina komprometidu atu fó apoiu nafatin ba forsa defeza Timor-Leste”, Coliati reitera iha Kuartél Jerál F-FDTL, Fatuhada, ohin.
Nia dehan durante ne’e Xina nia apoiu ba forsa defeza ne’e, liuliu iha área akademia militár, saúde militár no lojístika. “Nune’e ita-nia membru militár mós daudaun ne’e lubuk ida sei hala’o formasaun iha Xina, iha área lojístika nomós ofisiál juniór”, dehan.
Iha enkontru ne’e mós parte rua asina mós akordu kooperasaun defeza entre Timor-Leste ho Xina, liliu iha área lojístika nian nomós iha setór edukasaun.
“Akordu ne’e liuliu kona-ba Ospitál Militár ne’ebé tinan oin Governu Xina sei harii, no akordu kona-ba apoiu formasaun rekursu umanu iha área lojístika ninian”, nia konklui.
Notísia relevante: Primeiru-Ministru asume kargu Ministru Defeza interinu
Jornalista: Arminda Fonseca
Editora: Maria Auxiliadora
