Bankada CNRT prepara ona kandidatu ba komisáriu CNE

DILI, 20 Agostu 2026 (TATOLI) – Bankada Kongresu Nasionál Rekonstrusaun Timorense (CNRT, sigla portugés) iha ona kandidatu ba komisáriu ba Komisaun Nasionál Eleisaun (CNE) ba períodu 2026-2031, ne’ebé sei aprezenta ba meza Parlamentu Nasionál.

Xefe bankada CNRT, Patrocínio dos Reis Fernandes, hatete katak maski kompozisaun estrutura atuál nia mandatu ramata ona, maibé kontinua hala’o knaar hodi hein to’o nomeasaun foun.

Nia dehan tanba Parlamentu agora iha faze resesu no seidauk bele konvoka plenária atu halo eleisaun. “Maibé, ita haree hela depois 15 Setembru, Parlamentu funsionamentu normál, sei haree fali prosesu ne’e”, nia informa iha Parlamentu, ohin.

Deputadu ne’e esplika katak prosesu normál iha órgaun lejizlativu, kandidatu sira sempre aprezenta husi bankada parlamentár no opta sistema proporsionalidade. “CNRT hanesan bankada maioria iha Parlamentu serteza iha nia kandidatu. [Agora] iha naran barak, más iha tempu sei hasai iha plenária”, dehan.

Patrocínio hatete, tuir Lei Órgaun Eleitorál, kompozisaun CNE husi  Parlamentu iha reprezentante komisáriu na’in-tolu, tanba ne’e bankada parlamentár sira idaidak bele aprezenta ninia kandidatura. “Bele mós CNRT aprezenta [kandidatu] na’in-tolu no husi bankada FRETILIN, PD, KHUNTO, PLP sira idaidak aprezenta ninia kandidatu na’in-tolu, [maibé] depende ba votu hotu”, katak.

Iha fatin hanesan, Vise Bankada Frente Revolusionária Timor-Leste Independente (FRETILIN), David Dias Ximenes ‘Mandati, adianta katak iha tempu badak sei diskute ninia kandidatu hafoin aprezenta ba meza Parlamentu.

Lembra katak, Prezidente CNE, José Agostinho Belo, ho nia kompozisaun atuál ninia mandatu remata ona iha 16 Agostu ne’e.

Tuir Lei númeru 7/2026, 29 Maiu, alterasaun dahaat husi Lei númeru 5/2006, 28 Dezembru, Órgaun Administrasaun Eleitorál, reprezentasaun husi Parlamentu Nasionál iha membru na’in-tolu ba CNE, ho mandatu tinan lima, renovavel.
No órgaun lejizlativa ne’e mak sei hili Prezidente CNE, liuhusi eleisaun ba kandidatu sira ne’ebé bankada parlamentár sira aprezenta.

Kompozisaun komisáriu CNE ne’e iha membru efetivu ida no suplente ida nomeia husi Prezidente Repúblika. No Governu rasik liuhusi desizaun reuniaun Konsellu Ministru iha loron 12 fulan-Agostu ne’e indika ona Élviro Fernandes Moniz nu’udar membru efetivu no Odete Maria Belo nu’udar suplente ba membru CNE ba períodu 2026 to’o 2031.

Aleinde ne’e, na’in-ida membru efetivu no suplente ida husi Konsellu Majistratura Judisiál no membru efeitu ida no suplente ida husi Konsellu Majistratura Ministériu Públiku. Tuir lei, Prezidente Parlamentu mak sei fó pose hafoin dezignasaun.

Notísia relevante: https://tatoli.tl/2026/08/14/bankada-pd-hakarak-koalia-ho-cnrt-kona-ba-kandidatu-komisariu-cne/

Jornalista: Nelson de Sousa

Editora: Maria Auxiliadora