Rogeiro Lobato husu ba F-FDTL kontinua kaer metin espíritu luta FALINTIL
BAUKAU, 20 Agostu 2026 (TATOLI)–Antigu Komandante Forsa Armada Libertasaun Nasionál Timor-Leste (FALINTIL), Rogeiro Tiago Lobato, husu ba FALINTIL- Forsa Defeza Timor-Leste (F-FDTL) atu kontinua kaer metin espíritu luta FALINTIL nia uluk.
“Sira tenke kaer metin nafatin espíritu FALINTIL nian atu hadi’a rai ida-ne’e, defende rai ida-ne’e, espíritu hodi ita halo toman rai ida-ne’e. Tau ita-nia rai iha a’as liu ida-ne’e mak ha’u husu ba Forsa sira,” Rogeiro Tiago Lobato hateten ba Ajénsia TATOLI hafoin partipa iha serimónia komemorasaun loron FALINTIL ba dala-51, ne’ebé hala’o iha Foho-Matebian, Suku Abulir, Postu Administrativu Matebian, Munisípiu Baukau, Kinta ne’e.
Notísia relevante : Prezidente Repúblika konsidera F-FDTL nu’udár kontinuasaun obra FALINTIL
Nia nota, F-FDTL agora komesa dezenvolve-an ona ho di’ak tebes hodi adapta ona ba mundu ohin loron.
“Governu presiza nafatin apoiu no fó kapasitasaun ba sira, ne’e importante tebes no apoiu ekipamentu sira atubele profisionaliza sira-nia an ho di’ak liután,” nia akresenta.
Nune’e, nia husu ba Governu ati labele husik F-FDTL tanba sira ne’e sai instrumentu importante ba nasaun tanba sira-nia serbisu mak defende soberania nasaun nian. Tanba ne’e, presiza apoia nafatin formasaun no apoia ekipamentu ba sira atu F-FDTL bele dezenvolve-an ho di’ak liu sai forsa profosionál.
Jornalista : Natalino Costa
Editora : Julia Chatarina
