SEF arrekada reseita rihun $60-resin ba kofre Estadu
DIILI, 20 Agostu 2026 (TATOLI) – Diresaun-Jerál Floresta, Sekretaria Estadu Floresta (SEF), rekolla entre Janeiru no Jullu 2026, reseita hamutuk rihun $60-resin ba kofre Estadu.
Sekretáriu Estadu Floresta, Fernandinho Vieira, hatete reseita sira ne’e mai husi atividade produtu madeira no la’ós madeira hanesan atendimentu lisensa tula ai-teka metan, mutin, lisensa tula ai-sunu, no ai-sunu neʼebé guarda floresta apreenda, no mós lisensa esportasaun ai-teka, kutulák, tali-musan, kamii no seluk tan.
“To’o Jullu, ita rekolla reseita ba produtu madeira no la’ós madeira hamutuk rihun $60 ba Kofre Estadu”, Fernandinho Vieira reitera ba Tatoli, ohin.
Tuir nia, atividade ne’ebé halo hodi rekolla reseita ba iha produtu floresta iha rua mak lisensa tula no tesi ai bazeia ba despaxu Ministériu Agrikultura, Pekuária, Peska no Floresta (MAPPF) númeru 10/2011, no depaxu husi liña jerál floresta nian númeru 70/2020, ho baze legál sira husi atividade komunidade.
Lisensa seluk mak Diresaun-Jerál Floresta fó ba komunidade atu tesi ai sira ne’ebé populasaun rasik mak kuda hanesan ai-keta metan, mutin, ai-mahoni, no bandu komunidade tesi ai sira ne’ebé moris ho naturál hanesan ai-kiar, fukira, ai-bubur, ai-kameli no seluk tan.
Nia akrexenta katak lisensa tula ai ne’ebé komunidade selu ba MAPPF bazeia ba metru kúbiku hanesan ai-teka metan $25/m³, ai-teka mutin no ai-mahoni $15/m³.
Governante ne’e apela ba komunidade hotu katak sei akontese El-Niño, tanba ne’e labele sunu-rai, tesi ai arbiru, tanba impaktu ba rai aumenta manas.
Notísia relevante: SEF husu ema hotu uza konxiénsia atu labele sunu rai
Jornalista: Arminda Fonseca
Editora: Maria Auxiliadora
