Karketu FC reprezenta TL kompete iha “Asian Champions League Two”
DILI, 21 Agostu 2026 (TATOLI)–Karketu Dili FC sei reprezenta Timor-Leste iha kompetisaun internasionál klub Ázia nian, ka’er asuntu ba jogu play-off Asian Champions League Two (ACL 2) hodi hasoru Kasuka FC husi Brunei Darussalam iha loron 08 fulan-setembru 2026.
Treinadór Karketu Dili, Simón Elissetche, hateten jogu hasoru Kasuka FC husi Brunei sei sai dezafiu boot maibé nia fiar katak ekipa bele servisu hamutuk hodi buka vitória ba klasifikasaun ba faze grupu.
“Kona-ba jogu ne’ebé ita sei halo hasoru Kasuka iha Brunei, ita hatene katak sira mak adversáriu ida-ne’ebé defísil. Sira foin kontrata jogadór estranjeiru foun na’in-ualu. Sira mós halo ona jogu preparasaun hasoru Sabah husi Super League Malázia,” Simón Elissetche hateten ba TATOLI liuhusi WhatsApp, ohin.
Nia esplika katak Kasuka sei uza jogu internasionál hanesan preparasaun molok hasoru Karketu.
“Iha loron 04 Setembru, sira sei joga iha Asian Shopee Cup hasoru Digger Manila husi Filipina, iha Filipina. Jogu sira-ne’e sei fó esperiénsia ba sira molok jogu hasoru ita,” nia hatutan.
Treinadór xilianu ne’e subliña katak ekipa adversáriu tenke hetan respeitu, maibé Karketu mós iha objetivu klaru.
“Tanba ne’e, Kasuka mak adversáriu ne’ebé ita tenke konsidera no respeita. Maibé ita fiar katak ita bele servisu hamutuk no halo esforsu hotu atu hetan performa di’ak liu. Ho nune’e, ita bele buka vitória ne’ebé bele ajuda ita klasifika ba faze grupu, ne’ebé sei joga iha Myanmar,” nia afirma.
Daudaun ne’e Karketu kontrata ona jogadór lokál no internasionál lubuk ida hodi enfrenta jogu ne’ebé sei akontese fulan-setembru mai ne’e.
Jornalista : Hortêncio Sanchez
Editór : Cancio Ximenes
