La selu osan kausaun, arguidu na’in-13 kumpre prizaun preventiva
DILI, 21 Agostu 2026 (TATOLI)–Tribunál Judisiál Primeiru Instánsia Dili (TJPID) altera medida koasaun ne’ebé molok ne’e aplika ba arguidu na’in-13 envolve iha kazu online scam iha área Ulmera, Suku Tibar Postu Administrativu Bazartete, Munisípiu Likisá, foin lalais ne’e.
Polísia Nasionál Timor-Leste (PNNTL) liuhusi Diresaun Servisu Investigasaun Kriminál (DSIK) asegura no detein arguidu na’in-13, ne’ebé krime ne’e rejistu ho 0248/26.PNSIC.
TJPID molok ne’e Tribunál aplika ona medida koasaun Termu Identidade Rezidensia (TIR) no medida kausaun $10.000 ba kada arguidu, maibé durante ne’e sira la kumpre despaisu.
Notísia relevante : PNTL Dili hamutuk autorodade lokál komprometidu prevene krime online scam
Nune’e, iha Kuarta (19/08) TJPID hasai mandadu Judisiál hodi autoriza DSIK Komandu Jerál PNTL asegura no detein arguidu na’in-13 sira ne’ebé hela iha Likisá.
Hafoin Polísia ezekuta orden Tribunál, Polísia aprezenta kedan arguidu sira ne’e ba interrogatóriu dahuluk iha Tribunál.
Iha prosesu interrogatóriu dahuluk, TJPID altera hikas nia desizaun anteriór hodi aplika fali medida koasaun Prizaun Preventiva.
“Hafoin ezekusaun mandadu, arguidu na’in-13 lori bá Prizaun Becora atu kumpre medida Prizaun Preventiva tuir orden no desizaun autoridade judisiál kompetente,” referidu komunikadu ne’ebé Ajénsia TATOLI sita, Sesta ne’e.
PNTL reafirma kompromisu atu kontinua kombate atividade kriminál inklui fraude no forma krime sibernétika sira liuhusi investigasaun profisionál no kolaborasaun ho autoridade judisiál ho objetivu atu garante seguransa no orden públika iha Timor-Leste.
Jornalista : Natalino Costa
Editora : Julia Chatarina
