MJ integra programa prioridade rua iha KRP 2027
DILI, 21 Agostu 2026 (TATOLI)—Ministru Justisa, Sérgio Hornai, hateten iha Komité Revizaun Polítika (KRP) tinan 2027 ne’e, MJ integra programa prioridade rua mak jestaun terra propriedade ba direitu sidadaun nian no emisaun dokumentu ofisiál.
Programa kona-ba jestaun terra propriedade (asesu ba rai) ne’ebé sei haree kona-ba atribuisaun títulu propriedade ba sidadaun timoroan hodi garante sira-nia direitu iha tinan 2027 to’o 2031.
Programa prioridade daruak nian mak sei foka liu oinsá halo emisaun ba dokumentu ofisiál atu garante ninia plataforma ne’ebé integradu, asesivel ba sidadaun sira-nia interese
“Atu garante seguransa jurídika, administrasaun ne’ebé la’o ho lalais no bele fasilita utiliza iha fatin hotu-hotu liuliu passaporte no Billete Identidade (BI),” Ministru Justisa informa ba jornalista sira iha Ministériu Finansa, ohin.
Programa prioridade hirak ne’e sira prevee orsamentu hamutuk millaun $15 hodi apoia servisu jestaun administrativu nian ba sidadaun sira hotu.
“Orsamentu hirak ne’e mak atu responde ba preokupasaun sira-ne’ebé durante ne’e notariadu hasoru hanesan menus fasilidade no dokumentu balun emprime ho surat tahan de’it,” nia esplika
Jornalista : Alexandra da Costa
Editór : Cancio Ximenes
