MTR halibur osan rihun $700-resin ba kofre Estadu
MANATUTU, 21 Agostu 2026 (TATOLI)-Empreza Murak Rai Timor (MRT, E.P) arrekada, entre Janeiru no Agostu 2026, osan rihun $700-resin husi atividade ne’ebé sira halo.
Membru Konsellu Diretivu MRT, Dionísio Martins, esplika katak MRT rasik seidauk bele kontribui diretamente reseita ba kofre Estadu, tanba daudaun ne’e investimentu ka atividade mineiru nian sei halo hela esplorasaun no bainhira iha ona dezenvolvimentu mak foin bele sura ba reseita hira mak hatama ba Estadu.
Nia dehan osan ne’ebé sira hetan liuhusi serbisu ne’ebé sira halo hanesan driling, drone survey ka environment assessment ne’ebé sira halo ba empreza seluk.
“Tinan ida-ne’e ita hetan osan rihun $700-resin, espera tinan oin bele hetan millaun $1-resin, nune’e bele ajuda fali kofre Estadu no ita uza osan ne’e halo operasaun ba ita-nia serbisu”, Dionísio Martins dehan.
Nia realsa katak iha tinan ida-ne’e mak MRT foin halibur osan, tanba empreza ne’e rasik foin harii iha tinan 2023 no husi tinan ne’ebá mai iha hela faze preparasaun.
Notísia relevante: MRT divulga koñesimentu kona-ba Projetu Perfurasaun Mármore We-uah ba estudante sira
Jornalista: Arminda Fonseca
Editora: Maria Auxiliadora
