Iraun deskobre rezerva gás foun iha setór enerjétiku

DILI, 24 Agostu (TATOLI) – Iraun fó-sai iha loron-domingu deskoberta hosi rezerva gás natural iha setór enerjétiku liu metru kúbiku billaun 212 iha provínsia súl Fars nian.

Iraun deskobre ona gás naturál liu biliaun 200 hosi metru kúbiku iha provínsia súl Fars nian, ho metru kúbiku liu billaun 160 ne’ebé bele rekupera. Deskobrimentu ne’e mosu bainhira setór enerjétiku nasaun nian hasoru interupsaun hafoin fulan barak hosi atake sira EUA-Izraél nian iha instalasaun gás nian, depózitu mina-rai nian no rota transporte sira.

Ministru Petróleu, Mohsen Paknejad, hatete ba televizaun estatál katak bele hasai gás liu billaun 160 hosi metru kúbiku hosi kampu ne’e, hodi hatutan katak autoridade sira foti medida urjente hodi hahú nia dezenvolvimentu lalais liu.

“Rezerva gás foun sira deskobre iha súl provínsia Fars nian,” hatete hosi ministru Petróleu, Mohsen Paknejad, ba televizaun estatál, hodi hatutan katak bele hasai hosi kampu ne’e liu metru kúbiku billaun 160.

Nia deskreve ida-ne’e hanesan gás naturál ne’ebé midar, ne’ebé iha uitoan de’it hosi gás tóxiku sulfuru idrojéniu, ne’ebé rezulta iha kustu operasionál no dezenvolvimentu ne’ebé ki’ik liu.

Anúnsiu ne’e fó-sai bainhira setór enerjétiku Iraun nian kontinua hasoru impaktu hosi atake sira fulan barak nian hosi EUA no Izraél ba nia infraestrutura, no mós sansaun ekonómiku sira ne’ebé maka’as.

Paknejad hatete katak deskoberta ne’e sei sai hanesan fundasaun ida ne’ebé metin tebes ba futuru enerjétiku nasaun nian.

Notisia relevante: Iraun muda doutrina militár hosi defensiva ba ofensiva

Fonte: Xinhua/France 24