Komandu F-FDTL submete ona proposta manutensaun Ró militár Betanu
DILI, 24 Agostu 2026 (TATOLI)–Komandante Komponente Navál Komodoro Higinio das Neves, hateten, Komandu FALINTIL- Forsa Defeza Timor-Leste (F-FDTL) liuhusi Komandante Komponente Navál hamutuk ho Xefe Estadu Maiór Jenerál Forsa Armada (XEMGFA) solisita ona proposta ba Ministru Defeza Kontra Almirante Pedro Klamar Fuik atu halo manutensaun ba Ró militár Betanu.
Nia hatutan, iha momentu Governu hamutuk Komandu F-FDTL husik Ró militár Jaco ba tasi Behau, Postu Administrativu Lakló, Munisípiu Manatutu iha Sesta (07/08) foin lalais ne’e seidauk bele halo operasaun iha tasi-laran hodi kontrola atividade ilísitu sira, nune’e momentu ne’ebá kedan fó kedan proposta ba Governu atu halo tan manutensaun ba Ró militár Betanu no agora hasai ona husi tasi Behau hodi hahú halo manutensaun.
“Ró Betanu ne’e agora ita hatama ona, agora iha Behau,” Komodoro Neves hateten ba Jornalista sira iha Kuartel Jenerál F-FDTL, Fatuhada, Segunda ne’e.
Notísia relevante : Governu hamutuk ho Komandu F-FDTL hatún Ró Militár JACO halo operasaun iha tasi
Nia dehan, iha loron 16 Agostu ne’e ba partisipa iha reuniaun Komponente Navál Sudeste Aziatiku (ASEAN, sigla ingléz) nia husu tuir katak Ró Betanu atu hahú prepara ba manutensaun.
Komandante Komponente Navál ne’e ladún hatene orsamentu hira mak ba manutensaun Ró militár Betanu, tanba osan ba manutensaun ne’e mai husi Ministeriu Defeza, tanba ne’e ministériu mak direita, manutensaun hotu Ministériu mak direita responsável.
“Kona-ba ninian kustu no ninian buat sira ne’e, ami la hatene, ami so akompaña no simu de’it,” nia katak.
Jornalista : Natalino Costa
Editora : Julia Chatarina
