Komandu Komponente Navál mantein prioridade infrastrutura iha tinan oin
DILI, 24 Agostu 2026 (TATOLI)–Komandante Komponente Navál, Komodoro Higino das Neves, hateten, Komponente Navál mantein prioridade infrastrutura iha tinan oin.
“Prioridade Komponente Navál mak primeiru nian infrastrutura iha baze, tanba ita dezenvolve forsa ida iha área tolu mak importante hanesan rekursu umanu, infrastrutura ne’ebé bele iha entaun agora Governu investe ona ba meius, infrastrutura iha baze mós tenke dezenvolve para iha kais nune’e ita bele atraka,” Komodoro Neves hateten ba Jornalista sira iha Kuartél Jenerál F-FDTL, Fatuhada, Segunda ne’e.
Nia dehan, daudaun la’ós laiha liu meiu, iha RóMilitár rua hanesan Jaco no Betanu, tanba ne’e tenke prioriza infrastrutura liuliu hadi’a kais hodi ró ne’e bele atraka, la’ós Ró Militár ba atraka fali iha Portu Dili.
“Tanba ne’e infrastrutura mak tenke prioridade, depois hola ró. Rekursu umanu ita prepara kleur ona, sira bele uza ró ne’e hodi bele halo operasaun,” nia akresenta.
Notísia relevante : MD submete projetu konstrusaun Portu Navál-Bairru Militár ba Sekretariadu Grande Projetu
Iha biban ne’e, Komandante Komponente Navál, Komodoro Neves hateten, dezeñu ba Portu Navál konklui ona, nune’e hein obra konstrusaun iha tinan ne’e.
“Kona-ba nia dezeñu ami iha koñesimentu mai halo diskusaun iha ne’e kompania ne’ebé halo dezeñu ne’e konkorda ona agora la’o ona, hein para implementa ona,” nia tenik.
Nia dehan tan, dezeñu ba Portu Navál hotu ona atinje ona pursentu 100, falta entrega osan depois implementa.
“Ha’u labele ko’alia projetu ne’e tinan ne’e atu implenta, tanba so Ministru Defeza mak bele ko’alia ida-ne’e. Tanba osan buat hotu iha nia liman, nia mak aprova. Ha’u hanesan operasionál ha’u labele ko’alia dehan tenke halo iha tinan ne’e, se tinan ida-ne’e labele implenta ita laran metin tinan oin ita bele halo,” nia hato’o.
Jornalista : Natalino Costa
Editora : Julia Chatarina
