Obra Sentru Saúde Internamentu Uatulari hahú faze konstrusaun
VIKEKE, 24 Agostu 2026 (TATOLI)—Diretór Servisu Saúde Munisípiu Vikeke, Aljaksono S. Maia, informa prosesu projetu oba Sentru Saúde Internamentu iha Postu Administrativu Uatulari empreza responsável hahú faze konstrusaun.
“Kona-ba konstrusaun ba Sentru Saúde Internamentu iha Postu Uatulari, daudaun ne’e ita-nia empreza responsável koloka ona materiál konstrusaun ba fatin konstrusaun iha Suku Uaitame, konstrusaun agora la’o hela,” Aljaksono ba TATOLI iha Postu Vikeke Vila, Segunda ne’e.
Diretór SSM Vikeke ne’e esplika empreza ke’e ona uma fatin, monta estaka no hada ona fondasi uma nian.
Notísia relevante: Tinan ne’e, SSM Vikeke konstrui fasilidade saúde tolu
“Obra ne’e konstrui husi Autoridade Munisípiu Vikeke liuhusi Diresaun Planu Dezenvolvimentu Munisipál Vikeke ba tinan 2026. Obra ne’e bainhira konklui sei ajuda ita-nia komunidade iha Postu Uatulari no Uatukarbau asesu besik ona sentru saúde, la presiza dezloka pasiente to’o iha Sentru Saúde Internamentu Vikeke Vila,” nia dehan.
Nia sublinña konstrusaun sei ramata iha 31 Janeiru 2027, kompleta ho fasilidade hanesan sala atendimentu ba kazu emerjénsia iha kama haat (4), sala baixa ba ema adultu kama sanulu (10), sala baixa pedeatria ba labarik kama sanulu (10) no sala maternidade kama partu lima (5).
Projetu konstrusaun ne’e liuhusi konkursu públiku ne’ebé loke iha Administrasaun Munisípiu Vikeke ba tinan 2026, konstrusan referida gasta orsamentu $43.227,91, obra ne’e konstrui husi empreza Lekduadyti, Unipessoal, Lda, númeru kontratu:2643/AMV/VII 2026, hahú konstrusaun iha fulan-Jullu 2026.
Entretantu, konstrusaun fasilidade saúde ne’e sei fó benefísiu ba populasaun Postu Uatulari husi suku ualu (8) ho total hamutuk 76.972-resin no populasaun Postu Uatukarbau hamutuk 7.212-resin.
Jornalista: Vitorino Lopes da Costa
Editór: Xisto Freitas da Piedade
