VIKEKE, 22 Abríl 2026 (TATOLI)—Diretór Servisu Saúde Munisipál (SSM) Vikeke, Aljaksono S. Maia, informa tinan 2026 SSM Vikeke sei konstrui fasilidade saúde hamutuk unidade tolu (3) iha Postu Uatulari no Uatukarbau hodi atende komunidade.
“Ba tinan 2026 ne’e ita sei konstrui fasilidade saúde hamutuk unidade tolu. Nune’e, fasilidade sira-ne’e sai importante ba ita-nia komunidade. Kona-ba prosesu implementasaun nian daudaun ne’e ita hahú loke ona konkursu públiku ba empreza lokál sira iha Munisípiu Vikeke atu kompete,” Aljaksono S. Maia ba TATOLI iha Postu Vikeke Vila, Kuarta ne’e.
Nia aprezenta, konstrusaun fasilidade saúde ne’ebé sei implementa mak hanesan postu saúde Bolale, Suku Irabin de Cima, postu saúde iha Suku Loilu, Postu Uatukarbau no Sentru Saúde Internamentu (SSI) iha Suku Uaitame, Postu Uatulari.
“Konstrusaun ne’e importante tanba durante ne’e moras grave ruma husi Uatukarbau no Uatulari tenke transfere ba Munisípiu Vikeke ho distánsia ne’ebé dook,” nia subliña.
Tan ne’e, nia dehan, SSI iha Uatulari bainhira konstrui hotu sei kompleta fasilidade hanesan sala atendimentu kazu emerjénsia kama haat (4), sala baixa ba ema adultu kama sanulu (10), sala baixa pedeatria labarik kama sanulu (10) no sala maternidade kama partu lima (5).
“Aloka orsamentu ba konstrusaun postu saúde rua (2) no internamentu nian ha’u labele fó-sai ba públiku tanba daudaun ne’e iha hela prosesu konkursu. Maibé, prosesu konkursu ne’e hotu ita sei halo lansamentu iha tinan ida-ne’e,” nia relata.
Entretantu, orsamentu ba konstrusaun fasilidade saúde tolu ne’ebé konstrui iha postu Uatukarbau no Uatulari orsamentu mai husi Autoridade Munisípiu Vikeke liuhusi diresaun Planu Dezenvolvimentu Integradu Munisipál (PDIM).
Konstrusaun fasilidade saúde ne’e sei fó benefísiu ba populasaun Postu Uatulari husi suku ualu (8) ho totál hamutuk 16.972-resin no puplasaun Postu Uatukarbau hamutuk 7.212-resin.
Jornalista: Vitorino Lopes da Costa
Editór: Xisto Freitas da Piedade
