Ró Militár Jaco seidauk bele halo operasaun iha tasi hafoin halo manutensaun
DILI, 24 Agostu 2026 (TATOLI)–Ró Militár Jaco ne’ebé foin daudaun Governu hamutuk Komandu FALINTIL-Forsa Defeza Timor-Leste (F-FDTL) husi ba Tasi Behau, Postu Administrativu Lakló, Munisípiu Manatutu, iha Sesta (07/08) seidauk bele halo operasaun iha tasi laran hodi kontrola atividade ilísitu sira.
Komandante Komponente Navál Komodoro Higinio das Neves, hateten, razaun Ró Militár seidauk bele halo operasaun tanba tékniku husi Xina sei mai halo atualizaun ikus liu hodi monta tan instrumentu balun hanesan jeradór molok ró ne’e halo operasaun.
“Agora sei hein oituan tékniku mai halo atualiza jeradór prinsipál sira ne’e para hotu- hotu la’o di’ak mak ita bele opera ona. Semana rua tan ita bele opera ona,” Komodoro Neves hateten ba jornalista sira iha Kuartél Jenerál F-FDTL, Segunda ne’e.
Notísia relevante : Governu hamutuk ho Komandu F-FDTL hatún Ró Militár JACO halo operasaun iha tasi
Nia dehan, iha buat balun mak falta husi ró ne’e, tanba ne’e tékniku sira presiza atualiza mak foin halo operasaun. Tanba Ró Militár ne’e halo manutensaun totál, inklui troka hotu motór ró nian ne’e, tanba ne’e bainhira atu halo operasaun presiza halo atualizaun ikus ba sistema hotu iha ró laran mak foin halo operasaun.
“Manutensaun troka motór foun, entaun tenke ser atualiza fali iha sistema sira ne’e hotu, tenke ser funsiona di’ak para kuandu labele korslet (sirkuitu), kuandu nune’e entaun nia keima ona, entaun presiza halo atualizasaun mak nia foin opera,” nia akresenta.
Dadaun Ró Militár seidauk bele halo operasaun no daudaun hasai fali ona husi tasi mai rai maran para tékniku mai husi Xina hodi atualiza sistema sira hotu mak bele navega.
“Ne’e mak ita hein semana ida ka rua tan mak ita bele bele navega,” nia tenik.
Jornalista : Natalino Costa
Editora : Julia Chatarina
