MP kontinua avoka prosesu kazu korrupsaun ba CAC
DILI, 25 Agostu 2026 (TATOLI)–Komisáriu Adjuntu ba Investigasaun iha Komisaun Antí-Korrupsaun (CAC, sigla portugés), Alvaro Maria Fátima, hateten, Ministériu Públiku (MP) to’o agora kontinua dada prosesu (avoka) hodi la delega fali kazu korrupsaun sira ba CAC atu halo investigasaun.
“Neste momentu seidauk, maibé iha ona informasaun ruma ne’ebé hateten katak atu mai, maibé ita hein,” Komisáriu Adjuntu hato’o ba jornalista sira liuhusi konferénsia imprensa ne’ebé hala’o iha CAC, Farol, Tersa ne’e.
Nia haktuir, maski nune’e la difikuta instituisaun nia serbisu nune’e daudaun kontinua halo serbisu ho normál.
“Ha’u hanoin la difikulta tanba ita CAC ne’e halo buat klaru hanesan prevensaun la’o nafatin kooperasaun, investigasaun mak bele hateten Unidade Informasaun Seguransa (UIS) la’o nafatin. Purtantu laiha delegasaun kompeténsia husi Ministériu Públiku, la signifika CAC mate ka la halo ona serbisu, nia funsaun la’o hela,” nia akresenta.
Notísia relevante : Komisáriu CAC Rui Pereira dezmente informasaun iha dezentendimentu serbisu ho MP
Nia dehan, la’ós MP tenke delega mak CAC halo serbisu lae, tanba instituisaun ne’e mós iha poder atu investiga kazu sira ne’e depois aprezenta ba MP.
Alvaro reforsa, prosesu kona-ba kestaun ne’e ko’alia institusionál entre Komisáriu.
“Ha’u labele ko’alia hakat liu fali Señor Komisáriu nia poder. Purtantu tentativa hotu ami pur ezemplu ha’u no Komisáriu sira halo hanesan aprosimasaun atu tenta kria kondisaun di’ak atu nune’e ita-nia komunidade kuandu iha kazu sira hanesan korrupsaun tenke mai no lei define katak fó ona kompeténsia ba Polísia independente CAC ne’e kria hodi halo nia serbisu prevensaun no halo investigasaun ba krime sira ne’ebé iha indísiu ba korrupsaun, ida-ne’e lei mak ko’alia klaru,” nia akresenta.
Jornalista : Natalino Costa
Editora : Julia Chatarina
