Alkatiri: Kooperativa nu’udar sentru dezenvolvimentu solidáriu
DILI, 26 Agostu 2026 (TATOLI)-Sekretáriu-Jerál Partidu FRETILIN, Marí Alkatiri, hatete katak kooperativa nu’udar sentru ba dezenvolvimentu solidáriu, tanba Konstituisaun iha artigu 138 mós rekoñese kooperativa hanesan baze importante ba dezenvolvimentu país.
Tuir nia, iha Estadu ida bazeia ba prinsípiu sosiál, kooperasaun sai nu’udar baze ida ne’ebé garante katak direitu individuál labele limita ka taka direitu koletivu no prosesu dezenvolvimentu.
Nia hatete kooperativa nia baze ba dezenvolvimentu mak integrasaun entre aspetu sosiál no ekonomia. Bainhira dezenvolvimentu sosiál no ekonomiku la’o hamutuk, sei kontribui ba dezenvolvimentu ne’ebé di’ak liutám no kria kompetitividade ne’ebé saudavel.
“Iha kooperativa laiha partidu polítiku, maibé iha polítika. Kooperativa tenke moris iha fatin ida ne’ebé iha ligasaun ho situasaun polítika jerál. Kooperativa la’ós de’it ekonomia, más kooperativa mós polítika. Iha situasaun difisil hanesan agora tenke hamutuk atu hametin setór kooperativu. Ha’u fiar katak kooperativa nu’udar autór sosiál ba dezenvolvimentu ekonómiku no nia funsaun ida importante tebes”, Marí Alkatiri dehan iha abertura Asembleia Jerál Federasaun Kooperaiva Kréditu Hanai Malu (FCCHM, sigla portugés), iha Bairru Pité, ohin.
Nia salienta katak kooperativa atu hetan susesu tenke iha kapasidade atu mobiliza no organiza sidadaun sira iha forma koletivu, ho kapasidade organizativa ne’ebé forte, no iha vizaun no misaun ne’ebé klara. Liuliu, kooperativa tenke sai hanesan vida koletiva no solidária.
Enkuantu, Jerente Jerál FCCHM, Elizario Ferreira, informa katak atividade Asembleia Jerál diskute kona-ba aprezentasaun rezultadu avaliasaun ne’ebé Inter-Cooperative Council (ICC) hala’o ba kooperativa 49 iha Timor-Leste, durante períodu Dezembru 2025 to’o Marsu 2026.
Nia hatete katak, liuhusi semináriu ne’e, FCCHM sei define fali futuru dezenvolvimentu kooperativa nian, inklui progresu no meta ne’ebé aei atinje to’o tinan 2030.
“Kada kooperativa sei aprezenta sira-nia progresu no dezafiu, depois sei halo rezumu, halo konkluzaun ho fórmula nu’udar programa ba Planu Asaun Anuál ne’ebé sei implementa iha 2027. Nune’e, segura sustentabilidade institusionál kooperativa nian, estabilidade finanseira kooperativa nian, no estabilidade ekonómika membru nia, liuliu asegura bein estar membru sira-nian”, nia dehan.
Atividade ne’e hala’o loron tolu, entre 26 no 28 Agostu, ne’ebé tsei aka ho Asembleia Jerál hodi aprova relatóriu anuál ba 2025 nian.
Kona-ba progresu serbisu FCCHM, nia atividade liña kréditu la’o normál. Daudaun, FCCHM iha membru kooperativa hamutuk na’in-67.994, ne’ebé kompostu husi feto 53% no mane 47%, ho totál kapitál hamutuk millaun $28.
Notísia relevante: SEKoop komemora Loron Mundiál Kooperativa ho semináriu nasionál
Jornalista: Arminda Fonseca
Editora: Maria Auxiliadora
