Autoridade Munisípiu Bobonaru konstrui saladeaula tolu ba EBF Gelokaer

BOBONARU, 26 Agostu 2026 (TATOLI) – Autoridade Munisípiu Bobonaru (AMB), liuhusi Projetu Dezenvolvimentu Integradu Munisipál (PDIM) konstrui ona saladeaula tolu iha Eskola Báziku Filiál (EBF) Gelokaer, suku Ritabou, postu administrativu Maliana, atu responde ba falta saladeaula no permite estudante sira atu partisipa ensinu no aprendizajen iha turnu dadeer de’it.

Projetu ne’e hetan orsamentu hamutuk $104.557,88 no implementa husi empreza lokál Majoma Gomes Unipessoal Lda.

Enjeñeiru husi empreza Majoma Gomes, Abílio Barreto, hateten katak progresu fizíku konstrusaun agora atinje ona 20%. “Ami-nia serbisu agora to’o ona iha etapa koluna. Bainhira remata, ami sei komesa tau batako no kontinua ho konstrusaun balok iha leten”, nia dehan ba jornalista sira iha fatin konstrusaun, kuarta-feira ne’e.

Nia garante katak empreza sei remata projetu tuir prazu kontratu ne’ebé estabelese ho Autoridade Munisípiu Bobonaru. “Ami promete sei finaliza serbisu tuir tempu, tanba materiál lokál sira ami prepara ona, inklui materiál fabrikadu hanesan simentu no besi, atu garante serbisu la’o tuir planeamentu to’o remata”, nia realsa.

Kordenadór interinu EBF Gelokaer, Julião da Costa, hatete katak komunidade eskolár kontente ho konstrusaun sala foun tolu ne’e, tanba responde ba problema falta saladeaula ne’ebé eskola hasoru durante tinan barak.

“Ho konstrusaun sala tolu tan, ami espera bele organiza aula hotu iha parte dadeer, nune’e la presiza fahe turnu entre dadeer no loraik. Ida-ne’e sei ajuda tebes estudante sira”, nia dehan.

EBF Gelokaer simu estudante sira la’ós de’it husi aldeia tolu iha suku Ritabou, maibé mós husi suku Manapa, postu administrativu Kailaku, nune’e durante tempu udan, alunu sira, liuliu labarik ki’ik sira, hasoru difikuldade atu to’o eskola tanba tenke liu mota.

Julião argumenta katak ho sistema aula iha turnu dadeer de’it, estudante boot sira bele akompaña sira-nia alin sira la’o hamutuk bá eskola. “Bainhira konstrusaun ne’e remata, ami no estudante sira sei hetan fatin aprende ne’ebé di’ak no seguru. Ambiente seguru sei aumenta mós vontade estudante sira atu aprende ho di’ak”, Julião da Costa konklui.

Tuir dadus tinan letivu 2026, EBF Gelokaer akumula estudante hamutuk na’in 302 no profesór na’in-sanulu. Ho konstrusaun saladeaula foun tolu ne’e bele hadi’a kondisaun aprendizajen no responde ba nesesidade infraestrutura eskolár iha área referida.

Notísia relevante: EBF Roetete enfrenta falta profesór no matéria didátika atu apoia ensinu-aprendizajen

Jornalista: Sergio da Cruz

Editora: Maria Auxiliadora