Ekipa konjunta desmantela tan scam call center iha Metiaut
DILI, 26 Agostu 2026 (TATOLI)—Ekipa konjunta kompostu husi Diresaun Servisu Investigasaun Kriminál (DSIK) no Diresaun Servisu Intelijénsia Polísia (DSIP) iha Polísia Nasionál Timor-Leste (PNTL), hamutuk ho Servisu Migrasaun, Kuarta ne’e, halo operasaun no konsege desmantela tan rede scam call center iha área Metiaut, Aldeia Carungulau, Suku Metiaut, Postu Administrativu Kristu Rei, Munisípiu Dili.
Operasaun ne’e hala’ao iha 20:00 kalan, nune’e ekipa seguransa konsege asegura sidadaun estranjeiru na’in-16, kompostu husi mane na’in-15 no feto na’in-ida ne’ebé suspeitadu envolve iha atividade scam call center.
Tuir nota ne’ebé Ajénsia TATOLI asesu liuhusi PNTL, ekipa konjunta durante operasaun konsege asegura evidénsia sira inklui telemóvel kuaze 30-resin ne’ebé uza sim card husi operadór Telemor, ekipamentu starlink no karreta ida.
Notísia relevante : Tribunál aplika medida kausaun $3.000 ba kada arguidu suspeitadu atividade scam iha Metiaut
Hafoin asegura sidadaun estranjeiru sira ne’e no foti objetivu apreendidu sira ne’e maka transporta kedan sidadaun estranjeiru no evidénsia sira ne’e hotu kontinua kedas transporta ba edifísiu Diresaun Servisu Investigasaun Kriminál iha Kuartel-Jerál PNTL, Kaikoli atu submete ba prosesu identifikasaun no investigasaun.
Hafoin DSIK halo identifikasaun ba suspeitu sira, husu tan autorizasaun ba Ministeriu Públiku (MP) hodi halo detensaun.
Nune’e, MP autoriza PNTL atu detein sidadaun estránjeiru sira ne’e iha sela Polísia durante oras 72 tuir prosedimentu legál ne’ebé vigora, hafoin realiza prosesu investigasaun.
Polísia sei aprezenta ba Tribunál hodi prosede ba interrogatóriu judisiál dahuluk iha Tribunál Judisiál Primeira Instánsia Dili (TJPID).
Operasaun ne’e hatudu kompromisu husi PNTL, DSIK no DSIP sira atu kontinua kombate atividade kriminál transnasionál, liuliu atividade scam call center ne’ebé bele prejudika seguransa no interrese públiku.
Jornalista : Natalino Costa
Editora : Julia Chatarina
