Funsionáriu na’in-neen utiliza veíkulu Estadu iha finde semana deklara laiha gia de marsa
DILI, 26 Agostu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, halo prosesu sumáriu ba arguidu na’in-neen, nu’udar funsionáriu Estadu ne’ebé lori veíkulu Estadu iha finde semana foin lalais ne’e.
Ekipa Konjunta ne’ebé lideradu husi Komisaun Antí-Korrupasaun (CAC, sigla portugés) detein funsionáriu hirak ne’e iha área ne’ebé la hanesan.
Iha prosesu sumáriu ne’e, Tribunál liuhusi Juíz Turnu José Escurial halo uluk produsaun ba prova sira, lee sai faktu ne’ebé arguidu sira halo no maioria husi arguidu fó depoimentu katak sira lori veíkulu Estadu sein guiade marsa husi sira-nia superiór.
Tanba ne’e mak autoridade seguransa sira halo apreensaun no detein arguidu sira ho flagrante delitu, nune’e arguidu sira tenke kumpre detensaun durante oras 72 nia laran.
Notísia relevante : Funsionáriu nai’n-neen hetan detensaun tanba lori veíkulu Estadu iha fim semana
Ministériu Públiku (MP) konsidera arguidu sira hanesan autór ba krime ho forma konsumava no promove ho krime pekulatu de uzu.
Arguidu sira durante prosesu sumáriu hato’o nia depoimentu katak faktu sira ne’ebé Tribunál lee ne’e loos hotu.
Iha sala julgamentu, Arguidu ADS deklara katak nia serbisu iha Ministériu Edukasaun no momentu ne’ebá nia husi Dili bá Maubisse – Ainaru. Nia lori motór Estadu ne’ebé ministériu foin entrega iha fulan-rua liubá ho marka Verza.
Arguidu AST ne’ebé nu’udar Inspetór iha Ministériu Edukasaun Ainaru mai iha Dili ho asuntu atu vizita nia família, maibé bainhira fila mak autoridade ne’ebé pasa revista nota laiha karta despaisu (giade marsa) nune’e halo detensaun ba nia inklui motór
Arguidu N nu’udar mós funsionáriu iha Ministeriu Saúde uza motór Estadu ho marka Supra X. Momentu ne’ebá nia Xefe mak autoriza lori motór Estadu maibé ense mina rasik. Nune’e, arguidu konsege lori maibé laiha giade marsa tanba nia mai asuntu privadu husi Dili bá Aileu.
Enkuantu, Arguidu RP ne’ebé serbisu iha Programa Nasionál Dezenvolvoimentu Suku (PNDS) Maubisse, uza karreta Estadu ho marka Hilux husi dirasaun Dili bá Maubisse. Autoridade sira ne’ebé halo hela pasa revista detein nia iha Kasnafar tanba laiha giade marsa.
Arguidu RM hanesan Xefe Departamentu iha Ministeriu Saúde, konfesa katak uza Karreta Estadu iha Sábadu no Domingu maibé laiha giade marsa, nune’e Polísia ne’ebé halo hela pasa revista detein nia iha Kasnafar.
Arguidu RG relata ba Tribunál katak nia nu’udar funsionáriu iha Ministériu Justisa iha estabelesimentu Prizionál Suai, iha Sesta foin lalais ne’e nia lori CPV mai asina no aproveita haree nia oan ne’ebé eskola iha Dili. Nune’e, iha Domingu bainhira nia fila bá Suai mak autoridade sira halo detensaun ba nia.
Nia konfesa momentu ne’ebá laiha duni giade marsa no karta viajen, tanba ne’e autoridade sira detein nia ho flagrante delitu iha área Kasnafar.
Alegasaun
Hafoin Tribunál halo tiha produsaun prova sira ba Arguidu na’in-neen, nune’e prosede kedan ba alegasaun.
Iha alegasaun, MP ne’ebé reprezenta husi Prokuradór João Marques, hateten, haree ba arguidu sira-nia depoimentu iha faze prova nian, arguidu sira deklara katak momentu sira lori viatura Estadu laiha giade marsa, tanba ne’e MP entende katak krime ne’ebé promove ba arguidu sira ne’e provadu.
Nune’e, MP solisita ba Tribunál atu tetu hodi foti desizaun tuir sirkustánsia sira husi krime pekulatude uzu ne’ebé previstu iha lei númeru 7/2020 artigu 83 no artigu 296 husi Kódigu Penál.
Liután, MP husu ba Tribunál atu aplika aplika ba arguidu sira pena tuir moldura penál ne’ebé mak husi krime iha artigu ne’e.
Defeza arguidu sira-nia, Defensór Públiku Manuel Amaral husu ba Tribunál atu aplika pena fulan-neen to’o tinan-ida no suspende nia ezekusaun ba tinan ida.
Advogadu Privada, Elizabeth Lopes, haree katak arguidu sira koopera di’ak tebes ho autoridade iha momentu apreensaun no detensaun, tanba ne’e nu’udar defeza husu ba Tribunál atu substitui pena prizaun ba fali pena multa.
Liberta arguidu sira
Hafoin rona parte hotu, Juíz José Escurial valida detensaun arguidu na’in-neen nian hodi liberta hikas arguidu na’in-neen no haruka filafali bá uma.
Tribunál mós hasai objetu apreendidu sira hanesan motór no karreta ne’ebé mak autoridade foin daudaun halo apreensaun hodi entrega filafali ba nia na’in nune’e bele uza fali bá serbisu.
Tribunál mós fó prazu loron-lima ba arguidu sira atu mai rona desizaun ikus ba krime ne’ebé MP promove ba sira. Razaun fó prazu loron-lima tanba labele fó sai emediatu despaisu ba arguidu sira tanba sira barak.
Nune’e, Tribunál deside iha Segunda (31/08) tuku 14:00 sei hasai despaisu ikus ba arguidu sira.
Jornalista : Natalino Costa
Editora : Julia Chatarina
