Governu renova mandatu Komité Orientadór 25 ba períodu tinan lima
DILI, 26 Agostu 2026 (TATOLI) – Governu aprova ona, iha reuniaun Konsellu Ministrus, projetu Rezolusaun Governu nian hodi renova mandatu Komité Orientadór 25 ba períodu foun tinan lima nian, hafoin mandatu atuál remata iha fulan-janeiru 2027.
Tuir komunikadu governamentál ne’ebé TATOLI asesu, inisiativa ne’e ho objetivu atu garante kontinuidade no konkluzaun traballu peskiza, análize no elaborasaun Livru “Istória Rezisténsia Juventude no Estudante Timor Leste nian”, ho volume I, III, no IV ne’ebé konklui ona.
“Rezolusaun Governu ne’e mós determina katak despeza no kustu sira ne’ebé mosu hosi atividades Komité nian sujeita ba rejime aplikavel relasiona ho konsesaun subvensaun públika no suporta hosi verba sira ne’ebé hatuur iha orsamentu anuál Ministériu Edukasaun nian”, refere dukumentu Governu nian.
Komité Orientadór 25 ne’e mós tenke halo koordenasaun ba implementasaun ninia atividades ho Ministériu Asuntus Kombatentes Libertasaun Nasionál no ho Centro Nacional Chega!, IP.
Notísia relevante: Komité Orientadór 25 hakerek ona istória rezisténsia husi 1974 to’o 1975
Jornalista: Alexandra da Costa
Editór: Cancio Ximrnes
