PT. Minarta reabilita irrigasaun Maliana I
BOBONARU, 26 Agostu 2026 (TATOLI) – Empreza Internasionál PT. Minarta hahú halo reabilitasaun ba irrigasaun Maliana I, iha munisípiu Bobonaru, bazeia ba orientasaun husi Ministru Agrikultura, Pekuária, Peska no Floresta, Marcos da Cruz, tanba kanál antigu ne’ebé Governu Japaun konstrui hetan danu husi dezastre naturál ho totál metru 40 liu.
“Hahú reabilita ona kanál irrigasaun Maliana I, espera katak inísiu Dezembru bele konklui ona”, Diretór Servisu Munisipál Agrikultura, Autoridade Munisípiu Bobonaru, Longuinhos João, hatete iha kuarta-feira ne’e.
Natar-na’in, Lúcio de Jesus, fiar katak estrutura ka sistema ne’e bele lori bee husi kanu-matan ba kanál irrigasaun ho di’ak, tanba estrutura ne’e konsidera di’ak liu bazeia ba kondisaun jeolójika no fízika rai nia.
“Ida-ne’e ba ami sente di’ak, tanba bainhira rai-halai mós ninia strutura metin nafatin, tanba cor metin no iha nia ai-riin, la hanesan uluk ne’e cor loos de’it. Kuandu rai-halai, automatikamente nia mós halai no nakfera hotu”, nia dehan.
Lúcio argumenta katak daudaun ne’e atividade agríkola ne’ebé depende ba bee irrigasaun Maliana I suspende hela. “Ami hein irrigasaun ne’e hotu mak bee mai fali, ami bele halo natar, kuda modo, batar no aktividade ortikultura seluk tan”, nia realsa.
Irrigasaun Maliana I reabilita dahuluk husi Ajénsia Kooperasaun Internasionál Japaun (JICA) entre tinan 2008 no 2009, hanesan parte husi apoiu povu japonés nudar sinál amizade no kooperasaun entre nasaun rua.
Tuir dadus, irrigasaun ne’e fornese bee ba natar hamutuk ektare 1.050-resin pertense suku Lahomea, Raifun, Ritabou no Odomau.
Notísia relevante: Autoridade Maliana hasai sirkulár suspende atividade agríkola iha irrigasaun Maliana I
Jornalista: Sergio da Cruz
Editora: Maria Auxiliadora
