SEF koloka pesoál na’in-rua iha pontu entrada Santuáriu atu prevene inséndiu

DILI, 26 Agostu 2026 (TATOLI)-Xefe Departamentu Protesaun Floresta no Kontrolu Inséndiu, iha Sekretaria Estadu Floresta (SEF), Benedito Ximenes, hatete inséndiu iha foho Ramelau, munisispiu Ainaru, no Atsabe, munisípiu Ermera, deskonfia kauza husi ema deskoñesidu.

Nia dehan katak ahi han iha pontu entrada bá Santuáriu Na’in-Feto Ramelau deskonfia tanba vizitante sira fuma sigarru mak soe ba du’ut maran, ne’ebé iha tempu bailoro fásil atu sunu.

Enkuantu iha Atsabe, inséndiu akontese tanba ema sunu parte klaran iha área Atsabe no Hatubuiliku, nune’e ahi-han besik to’o santuáriu Na’in Feto Ramelau.

“Maibé, esforsu ne’ebé ita-nia parte halo mak bainhira akontese, tékniku inséndiu, bombeiru no pesoál turizmu nian serbisu hamutuk hodi hamate ahi, maibé ahi nia lakan ho anin hamutuk lais loos, entaun iha Ramelau nian ahi han rai kuaze ektare haat no Atsabe kuaze ektare 30”, Benedito Ximenes hatete ba Tatoli, ohin.

Nia dehan, to’o agora, autoridade sira nafatin konsidera ema deskonesidu mak hamosu inséndiu ne’e, tanba SEF seidauk iha ekipamentu natoon hanesan, inklui drone, atu monitoriza no identifika autór sira bainhira inséndiu akontese.

Nia esplika katak, bainhira inséndiu akontese, ekipa sira ba kedas iha fatin, maibé dala barak la iha informasaun klara kona-ba ema ne’ebé provoka inséndiu.

“Ita iha Dekretu-Lei númeru 19/2009 iha alínea 17 hatete, sé de’it mak tesi ai, sunu rai husi fatin ida ba fatin ida, sei hetan pena prizaun tinan tolu ka multa, maibė ita seidauk bele kaer ema ida, tanba bainhira akontese inséndiu ita bá laiha ema ida fó informasaun ne’ebé loos”, dehan.

Tuir nia, inséndiu iha santuáriu Ramelau ne’ebé akontese dalabarak, liuliu tanba vizitante sira. Iha fulan-Outubru, sei realiza peregrinasaun bá Na’in-Feto Ramelau ne’ebé sei dada vizitante barak. Tanba ne’e, SEF destaka ona pesoál na’in-rua iha pontu entreda Santuáriu Ramelau nian atu fó informasaun no orienta vizitante sira atu la fuma sigarru durante vizita, hodi prevene posibilidade inséndiu.

Aleinde ne’e, SEF koordena ho autoridade lokál atu kontinua sosializa komunidade kona-ba importánsia kona-ba labele sunu rai arbiru tanba daudaun tempu bailoro ona.

Realasiona akontesimentu sira ne’e, Bendito Ximenes husu ba Governu atu konsidera apoiu ba ekipamentu nesesáriu, inklui sira sosa drone no ekipamentu komunikasaun, hodi fasilita sira halo kontrolu bá iha fatin risku sira.

“Ami planu ona atu sosa ekipamnetu sira ne’e, maibé buat hotu depende ba Governu tanba tinan oin foku ba planu prioridade Governu nian”, nia konklui.

Notísia relevante: SEF husu ema hotu uza konxiénsia atu labele sunu rai 

Jornalista: Arminda Fonseca

Editora: Maria Auxiliadora