Timor-Leste rejista progresu iha implementasaun roteiru hosi adezaun ba ASEAN
DILI, 26 Agostu 2026 (TATOLI)- Vise-Ministra ba Asuntus Asosiasaun Nasaun Sudeste Aziátiku (ASEAN, sigla iha inglés), Milena Rangel, iha Kuarta ne’e, aprezenta ba Konsellu Ministrus rezultadu sira Relatóriu Sekretariadu bloku rejionál kona-ba implementasaun roteiru hosi adezaun plena Timor-Leste nian ba organisaun.
Dokumentu Governu refere katak relatóriu, ne’ebé abranje progresu sira ne’ebé rejista ona husi fulan-Maiu 2025 to’o fulan-Janeiru 2026, destaka avansu sira ne’ebé Timor-Leste alkansa hodi kumpre kritériu sira ne’ebé estabelese ona iha Roteiru ne’e, inklui partisipasaun ativa iha reuniaun sira ASEAN nian, hametin mekanizmu koordenasaun interministeriál sira, funsionamentu Misaun Permanente Timor-Leste ba organizasaun, no mós dezignasaun entidade no pontu fokál nasionál sira ne’ebé responsavel ba área kooperasaun sira ne’ebé diferente.
“Entre fulan-Janeiru no fulan-Setembru 2025, Timor-Leste partisipa ona iha enkontru 455 hosi 504 ne’ebé hetan konvite, ne’ebé korresponde ba taxa partisipasaun 90,3%,”afirma Komunikadu Governu ne’ebé TATOLI asesu.
Husi kritériu hitu ne’ebé prevee ona iha Roteiru, lima maka implementa tomak ona, inklui sira ne’ebé relasiona ho kapasidade institusionál, Misaun Permanente, mekanizmu implementasaun no koordenasaun nasionál, izensaun vistu no rekoñesimentu pasaporte, no mós obrigasaun finanseira ne’ebé mosu hosi adezaun.
“Prosesu adezaun ba instrumentu jurídiku sira ASEAN nian implementa parsialmente ona, ho rekizitus pilár Polítiku-Seguransa no Sosiokulturál nian ne’ebé kompleta tiha ona no serbisu kontinua iha ámbitu Komunidade Ekonómika nian. Preparasaun ba infraestrutura no kapasidade lojístika ne’ebé nesesáriu ba responsabilidade futuru Timor-Leste iha ASEAN no ba Prezidénsia organizasaun ne’e iha tinan 2029 mós la’o hela”, nia konklui.
Notísia relevante:ASEAN-COCI kolabora ho Kamboja aborda kestaun ajuda mídia tradisionál halo transformasaun dijitál
Jornalista: Alexandra da Costa
Editór: Cancio Ximenes
