AMB lamenta ema deskoñesidu sobu sinál tránzitu iha Maliana
BOBONARU, 27 Agostu 2026 (TATOLI)- Ema deskoñesidu sobu sinál tránzitu ne’ebé instala iha estrada ninin kapitál Maliana, munisípiu Bobonaru, liuliu iha trosu husi Igreja Maliana bá iha área Pemancar besik Ensinu Báziku Sentrál Victor Santa.
Sekretariu Autoridade Munisípiu Bobonaru ba Asuntu Planeamentu no Dezenvolvimentu Integradu, Semedo Laco Costa, lamenta no husu líder komunitáriu no populasaun hotu atu tau-matan ba fasilidade públika ne’e.
“Sinál ida-ne’e ba interese komún hodi salva ema nia vida. Kuandu dalan sira ne’e laiha sinál, entaun ita la’o rungu-ranga, entaun sinál sira ne’e ajuda tebetebes ita para viajen ho seguru”, nia dehan.
Semedo afirma katak Autoridade Munisipiu Bobonaru sei foti sansaun rigoroza ba sidadaun ne’ebé sobu sinál tránzitu iha fatin públiku.
“Ita nia sirkulár foun atu implementa ne’e mós tau kona-ba sinál tránzitu no sé mak kontra no estraga ita sei aplika multa ba nia, tanba ita-nia Estadu fakar osan barak ba estrada no sasán sira ne’e para ita atu uza, la’os estraga”, nia lamenta
Notísia relevante: DNTT Bobonaru no PNTL husu komunidade aumenta disiplina iha estrada hodi redús asidente
Funsaun prinsipál husi sinál tránzitu mak atu regula sirkulasaun, garante seguransa rodoviária, no evita asidente iha dalan públiku.
Notísia relevante: Komisaun E sujere ba DNTT tau sinál tránzitu iha área risku ba asidente tráfegu
Jornalista: Sergio da Cruz
Editora: Maria Auxiliadora
