Atualizasaun inundasaun iha Nepál: Númeru ema mate sa’e ba na’in-165 no 826 lakon
DILI, 27 Agostu (TATOLI) – Númeru hosi ema mate tanba inundasaun iha norte Nepál nian to’o ona na’in-165, ho ema na’in-826 mak sei lakon, fó-sai hosi ajénsia governamentál nepalés ida iha loron-kinta ne’e.
Autoridade Nasionál Redusaun no Jestaun Risku Dezastre Nepál nian fó-sai katak, iha relatóriu ida katak númeru ne’e inklui pesoál seguransa, lokál no turista estranjeiru no doméstiku sira. Autoridade hatete katak to’o agora ema na’in 73 maka hetan kanek no hetan hela tratamentu iha ospitál.
Media Nepál, Khabar Online ne’ebé sira relatóriu nepales nian, fó-sai katak, mate-isin hosi ema na’in-165 ne’ebé mate iha inundasaun sira Rasuwa nian hetan ona, enkuantu ema na’in-826 sei lakon.
To’o tuku 8:15 dadeer Kinta-feira, hetan ona mate-isin 65 iha Chitwan, 27 iha Dhading, 12 iha Nuwakot, rua iha Rasuwa, 20 iha Gorkha, 26 iha Nawalparasi Leste, neen iha Tanahun no lima iha Nawalparasi Oeste.
Operasaun sira buka no salvamentu nian hahú fali iha Kinta-feira dadeer iha área sira ne’ebé afetadu hosi inundasaun.
Enkontru multipartidu ida mós hala’o daudaun atu diskute maneira sira atu halo operasaun sira salvamentu no tulun nian sai efetivu liután.
Tuir boletín Polísia Nepál nian ne’ebé fó-sai iha tuku 8:15 dadeer, ema na’in 826 maka seidauk hatene tanba inundasaun sira.
Entre sira ne’ebé lakon mak pesoál Ezérsitu Nepal nian na’in-44, pesoál Polísia Nepál nian na’in-28, pesoál Forsa Polísia Armada na’in-13 no turista na’in-579. Nune’e mós, rezidente 161 hosi Rasuwa no ema ida hosi Nuwakot maka relata ona lakon.
Autoridade sira kontinua ona operasaun sira buka no salvamentu nian iha kurridór sira mota nian ne’ebé afetadu no área sira ne’ebé haleu.
Notísia relevante: Inundasaun hamate ema na’in-157 iha Nepál
TATOLI
