Eleisaun Asembleia Munisipál fó kuota 40% ba feto
DILI, 27 Agostu 2026 (TATOLI)-Diretora Nasionál Dezenvolvimentu Igualdade Jéneru iha Sekretária Estadu Igualdade (SEI), Olga da Costa Monteiro, hatete Eleisaun Asembleia Munisipál fó kuota 40% ba feto atu sai deputadu lokál.
Nia dehan Lei Partidu Polítiku fó importánsia kada partidu polítiku sira atu konsidera kuota 30% ba Eleisaun Parlamentu Nasionál, maibé iha Eleisaun Asembleia Munisipál agora fó kuota 40%.
“Ida ne’e hatudu Timor-Leste iha lei ne’ebé asegura feto boot tebes no enkoja feto sira atu partisipa másima iha Eleisaun Asembleia Munisipál iha tinan 2027”, nia dehan bainhira sai oradora iha semináriu nasionál ho tema “Demokrásia, Dame no Lideransa Inkluziva” hodi komemora Loron Konsulta Populár 30 Agostu, iha Kampus UNTL, Dili, ohin.
SEI hamutuk ho parseiru sira halo advokásia koab-ba lejizlasaun ne’ebé iha no fó formasaun ba feto potensiál sira iha munisípiu hotu hodi enkoraja atu partisipa másima. “Ita labele haree de’it sistema patriarkal ne’ebé dominante husi mane”, nia dehan.
Tuir Olga Monteiro, país sira husi Asosiasaun Nasaun Sudeste Aziátiku (ASEAN, sigla inglés) valoriza tebes Timor-Leste maski nasaun joven no ki’ik, maibé oportunidade ba feto hanesan ho mane sira.
“Tanba, ita iha Parlamentu Nasionál iha feto ida mak lidera, ne’e iha Ázia, Timor-Leste de’it mak sai primeiru ezemplu, depois iha Governu iha feto 19% ne’ebé asume kargu ministra no sekretária Estadu, no feto asume kargu xefe suku 5%”, nia relata.
Notísia relevante: Feto potensiál presiza partisipa iha eleisaun podér lokál – SEI
Jornalista: Nelson de Sousa
Editora: Maria Auxiliadora
