Grupu Hul-Topol no Lalia-Girál reativa atividade haki’ak manu
BOBONARU, 27 Agostu 2026 (TATOLI) – Grupu rua Hul-Topol no Lalia-Girál, iha aldeia Tunubibi, suku Tapo-Memo, postu administrativu Maliana, munisípiu Bobonaru, reativa atividade haki’ak manu hafoin paradu durante fulan ualu.
Koordenador Sentru Dezenvolvimentu Aldeia Tunubibi, Adriano Jasen Santos, konfirma katak grupu rua ne’e hahú atividade iha semana kotuk hodi haki’ak manu broiler 500.
“Agora, ami-nia atividade la’o ona. Durante ne’e espalla iha mídia katak atividade paradu tanba nia prosesu mak hanesan ne’e. Iha loron 22 ne’e mak manu tama hamutuk 500”, nia informa ba jornalista sira, ohin.
Koordenadór ne’e dehan iha segunda faze, manu broiler biku 500 sei tama tan no sura hamutuk 1.000. Aleinde ne’e, Adriano subliña grupu ne’e mós hahú reativa atividade kuda-modo.
“Ami muda ami-nia atividade tanba antes ne’e ami haki’ak manu Mareko, maibé mate hotu no rezultadu ladún di’ak. Ami muda fali ba manu broiler, haki’ak ikan nila no ortikultura”, nia relata.
Membru grupu Setelinda António kontente tanba grupu bele moris filafali ho atividade foun. “Durante ne’e ami hanoin grupu ne’e monu ona, maibé realidade ami hala’o nafatin atividade, manu mós tama ona, agora ami halo atividade hanesan baibain”, nia dehan.
Notísia relevante: Komunidade husu auditoria ba Programa Haki’ak Manu Mareko ne’ebé paradu iha Tunubibi
Aleinde ne’e, membru grupu Maria Fátima Ena reforsa katak atividade haki’ak manu broiler di’ak liu kompara ho manu mareko.
“Manu mareko ne’e difísil la halimar, tanba nia mate loroloron. Fó han mós atu sukat tuir nia takaran”, nia realsa.
Grupu rua ne’e hetan apoia fundu rotativu husi Ministériu Dezenvolvimentu Rurál no Abitasaun Komunitária ho totál rihun $40 hodi promove atividade ekonomia.
Notísia relevante: MDRHC halo inspesaun ba atividade grupu rua iha Tunubibi
Jornalista: Sergio da Cruz
Editora: Maria Auxiliadora
