PNTL submete ona suspeitu na’in-16 ba krime scam call center iha Metiaut ba MP
DILI, 27 Agostu 2026 (TATOLI)–Polísia Nasionál Timor-Leste (PNTL) submete ona suspeitu na’in-16 ne’ebé suspeitadu ba krime scam call center iha Metiaut, ne’ebé ekipa konjuta asegura no detein ona iha Kuarta (26/08), daudaun ne’e submete ona ba Ministériu Públiku (MP).
“Operasaun ne’ebé ami halo horikalan, ami monitoriza atividade balun ne’ebé mak suspeita ba krime transnasionál, organizadu no asosia ba kriminál, ho nune’e horikalan ami halo intervensaun ba fatin ida, otél ida iha Metiaut ne’ebá iha operasaun flagrante delitu ami kaer sidadaun estranjeiru 16 ne’ebé kompostu husi feto ida no mane 15, sidadaun Xina na’in-hitu, sidadaun Myanmar na’in-hitu, sidadaun Suriname na’in-ida no sidadaun Vietname na’in-ida,” Portavós Komandu PNTL, Superintendente Xefe Polísia João Belo dos Reis, hateten liuhusi konferénsia imprensa ne’ebé hala’o iha Komandu Jerál PNTL, Kaikoli, Kinta ne’e.
Notísia relevante : Ekipa konjunta desmantela tan scam call center iha Metiaut
Nia haktuir, horikalan ekipa konjunta deteta sidadaun ida husi nasaun Suriname mós envolve iha laran.
“Prosesu ba kazu ida-ne’e depoisde ita halo kapturasaun ho flagrante delitu iha fatin ne’ebá. Ita transporta mai iha DSIK (Diresaun Servisu Investigasaun kriminál) depois halo prosesu identifikasaun agora agora sidadaun ne’ebé suspeita ba iha Scam call Center ne’e iha asegura ona sala detensaun polísia Komandu Munisípiu Dili nian,” nia akresenta.
PNTL rejista kazu ne’e ho Númeru Úniku Kriminál (NUK) nian 0323/2026-PNSIK.
“Prosesu investigasaun sei kontinua no depois sei aprezenta iha Ministériu Públiku kontinua iha Tribunál hodi halo primeiru interrogatóriu iha 72 oras nia laran,” nia katak.
Polísia foti evidénsia telemóvel 26, laptop, Starlink tolu no osan balun tan.
Nune’e, PNTL mós nafatin apela ba komunidade atu kontinua nota nafatin krime organizadu ne’ebé sei akontese nafatin iha Timor.
“Ami alerta ba ita-nia populasaun no líder komunitária sira atu kontrola no monitoriza sidadaun estranjeiru ruma ne’ebé hela iha sira-nia bairru atu aluga uma ruma, halo atividade ruma karik iha sira-nia bairru rezidénsia, halo favór informa ba Polísia atubele halo atuasaun, karik iha indikasaun ba krime organizadu internasionál ne’ebé daudaun ita halo hela operasaun,” nia tenik.
Portavós dehan, suspeitu na’in-16 ne’e foun, la’ós sira ne’ebé molok ne’e hetan ona desizaun husi Tribunál.
“Sira ne’e notas ita halo cross check iha data ne’ebé mak ita iha sira foun. Sira la’ós ida ne’ebé halo tiha asaun no Tribunál foti medidas depois envolve filafali laiha ne’e sira konsidera ne’e foun hotu kedan,” nia hato’o.
Jornalista : Natalino Costa
Editora : Julia Chatarina
