SECoop halo preparasaun ba eventu DRCMM 2026 atinje ona 75%
DILI, 27 Agostu 2026 (TATOLI)—Sekretária Estadu Kooperativa (SEKooP) nia preparasaun ba eventu Dili Regional Cooperative Ministers Meeting (DRCMM) 2026, atinje ona 75%.
Sekretáriu Estadu Kooperativa, Arsénio Pereira, hateten objetivu halo enkontru ho parséria dezenvolvimentu sira hodi atualiza preparasaun ba eventu boot ne’ebé Timor-Leste sei sai uma-na’in ba Dili Regional Cooperative Ministers Meeting (DRCMM) 2026, ne’ebé ida-ne’e enkontru ba dala-lima ona.
“Eventu ne’e sei hahú iha loron 01 to’o 04 fulan-Outobru ho ninia konteúdu ba konferénsia rejionàl entre ministru sira husi membru ASEAN no panelista ne’ebé sei ko’alia kona-ba asuntu kooperativa, diàlogu, polítika nivel ASEAN no espozisaun feira rejionál,” Sekretáriu Estadu ne’e relata ba jornalista sira iha edifísiu Korreius, Kintal Boot, ohin.
Governante ne’e mós husu ba parseiru dezenvolvimentu sira atu kontribui sira-nia hanoin no partisipasaun ba eventu ida-ne’e tamba grupu kooperativa balun husi ita-nia parseiru sira mós sei envolve hotu iha espozisaun.
“Iha eventu ne’e mós ita sei konvida panelista sira husi nasaun membru ASEAN ne’ebé iha esperénsia ba área kooperativa nian atu fahe fali ba ita-nia movimentu grupu kooperativa sira iha Timor-Leste hodi hakbiit sira-nia kapasidade,” nia hateten.
Tanba ne’e, nia hatutan katak sira-nia preparasaun másimu ona kuaze 75% no kona-ba lista prezenza membru ASEAN ne’ebé sei partisipa no númeru serteza husi grupu kooperativa sira mós iha hotu ona, maibé informasaun klaru sira sei públika liuhusi konferénsia imprensa ne’ebé sei hala’o iha loron 07 Setembru.
Membru Grupu Kooperativa CC Hadama Ainaru, Marçal Mendonça, hateten sira-nia parte sei partisipa hodi apoiu mós ba eventu ne’e no produtu ne’ebé sira sei lori iha espozisaun mak rekursu potensiàl husi Ainaru hanesan produtu lokál sira.
“Ami sei lori repollu, senoura, modo-tahan hodi ba faan iha feira rejionál ne’ebé sei hala’o iha fulan -Outobru. Produtu hirak-ne’e mak ami sei lori tanba konsideradu hanesan rekursu potensiál Munisípiu Ainaru nian,” membru kooperativa ne’e dehan.
Nia hatutan, husi eventu ida-ne’e fó oportunidade ba sira atu eleva di’ak liután sira-nia kapasidade, tamba sei iha nasaun membru ASEAN ne’ebé bele partilla sira-nia esperiénsia iha área kooperativa nian no bele promove produtu lokál ba nasaun membru sira seluk.
Produtu ne’ebé grupu kooperativa Timor-Leste sira sei lori maj hanesan kafé, baunilla, Bafo Kayrala, produtu lokál no seluk tan. Kona-ba akomodasaun ba bainaka sira sei destaka ba otél Palm Spring, Otél Timór, Otél Novu Turizmu, no Timor Plaza, enkuantu orsamentu ba eventu ne’e hamutuk rihun $614.
Jornalista : Alexandra da Costa
Editór : Cancio Ximenes
