DNTT rekolla reseita millaun $8,8, boot liu orsamentu alokadu ba tinan 2026
DILI, 28 Agostu 2026 (TATOLI)-Diresaun Nasionál Transporte Terrestre (DNTT), iha semestre dahuluk 2026, arrekada reseita hamutuk millaun $8,8 ba kofre Estadu.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hatete reseita ne’ebé sira rekolla boot liu alokasaun Orsamentu Jerál Estadu (OJE) 2026.
“Reseita ne’ebé ita rekolla hamutuk $8.898.472,50. Ita kompara ho orsamentu alokadu, ita rekolla liu tiha ona, tanba orsamentu aloka mai ne’e hamutuk millaun $1,8”, Nelson Sequeira informa ba Tatoli, ohin.
Nia esplika katak reseita ne’e mai husi atividade sira hanesan rejistu veíkulu, inspesaun ba veíkulu importadu, substituisaun livrete, emisaun dokumentu provizóriu hodi substitui livrete orijinál, kria xapa espesiál, emite karta kondusaun, no inspesaun veíkulu sira.
“Ha’u hakarak hato’o agradesimentu ba públiku tanba reseita sira ne’e husi sira, liuliu sira ne’ebé troka karta kondusaun no seluk”, nia dehan.
Dirijente ne’e subliña katak, tuir alvu DNTT ba tinan ne’e, rekolla reseita millaun $9, maibé foin fulan hitu de’it rekolla ona millaun $8, entaun to’o Dezembru bele kobre liu alvu ne’ebé iha.
Notísia relevante: DNTT arrekada reseita liu millaun $2 iha trimestre dahuluk
Jornalista: Arminda Fonseca
Editora: Maria Auxiliadora
