FFTL selebra kontratu ho Treinadór 24 ba Sentru Juvenil iha Munisípiu
DILI, 28 Agostu 2026 (TATOLI)– Federasaun Futeból Timor-Leste (FFTL) selebra ona kontratu ho treinadór hamutuk na’in-24 hodi reativa fali sentru juvenil iha baze no kada Asosiasaun Futeból Munisípiu. Sentru ne’e foku ba kategoria Sub-13 to’o 15 ba mane no feto.
Serimónia selebrasaun kontratu ne’e hala’o sesta ne’e iha edifisiu FFTL, no prezensa husi Sekretáriu Jerál FFTL, José Adilson Ribeiro, Adjuntu Sekretáriu Jerál, Fernando Baptista Xavier, Adjuntu Kordenadór Tékniku FFTL, Gaspar Quintão, Kordenadór Dezenvolvimentu Asosiasaun Membru FFTL, Crisogno da Costa, no reprezentante Asosiasaun Futeból Munisípiu sira.
Sekretáriu Jerál FFTL, Jose Adilson Ribeiro, hateten selebrasaun kontratu ne’e nu’udar kompromisu FFTL iha mandatu Prezidente, Nilton Telmo Gusmão dos Santos.
“Akordu ne’e nu’udar motivasaun boot ida ne’ebé FFTL no Asosiasaun Futeból sira hatudu iha ninia responsabilidade. Ami-nia objetivu mak atu produz jogadór foun husi munisípiu sira hodi garante kualidade ba selesaun nasionál iha tinan lima mai,” nia dehan.
Relatóriu ba FIFA no AFC
Nia husu ba treinadór sira atu labele fó treinamentu de’it, maibé tenke halo mós relatóriu ba atividade ne’ebé hala’o.
Relatóriu ne’e importante atu FFTL bele monitoriza no relata fali ba FIFA no AFC tanba programa ne’e mai husi organizasaun rua ne’e.
“Aleinde fó treinamentu ba juvenil sira, treinadór sira tenke halo relatóriu. Nune’e husi nasionál bele monitoriza nafatin treinamentu sira,” nia afirma.
Iha oportunidade ne’e, FFTL mós relata ba delegasaun FIFA kona-ba lala’ok treinamentu ba kategoria sub-15 no sub-17 ne’ebé hala’o ona iha kada Asosiasaun Futeból iha Timor-Leste.
Tuir Sekretáriu Jerál, FIFA fó apresiasaun ba atividade juvenil ne’ebé la’o di’ak tebes. Tanba ne’e FIFA komprometidu sei kontinua apoiu dezenvolvimentu Futeból iha Timor-Leste.
FIFA no AFC mós informa katak bainhira jestaun ba atividade ne’e la’o di’ak, iha tinan oin sei aumenta treinadór ba na’in-haat iha kada asosiasaun.
Kritériu ba Treinadór
Iha fatin hanesan, Adjuntu Sekretáriu Jerál FFTL, Fernando Baptista Xavier, esplika katak durasaun kontratu ba treinadór sira ba tinan ida. Kritériu mak treinadór tenke iha sertifikadu nivel-C.
“Ba treinadór sira-ne’ebé sei iha sertifikadu nivel-D, ami husu atu update. Tanba atu fó treinamentu ba juvenil sira presiza komprova katak treinadór iha duni koñesimentu liuhusi formasaun sira ne’ebé AFC fó,” nia dehan.
Iha serimónia ne’e, FFTL mós distribui sertifikadu ba treinadór hamutuk na’in-24 ne’ebé mai husi kada Asosiasaun Futeból Munisípiu, ho kada asosiasaun reprezenta treinadór na’in-rua.
Jornalista : Hortêncio Sanchez
Editór : Cancio Ximenes
