Komemora loron Konsulta Populár, RAEOA promove atividade oioin ho montante rihun $8
OEKUSI, 28 Agostu 2026 (TATOLI) – Komemora loron Konsulta Populár 30 Agostu, Autoridade Rejiaun Administrativa Espesiál Oekusi Ambeno (RAEOA), promove atividade oioin ho montante orsamentu hamutuk rihun $8.
Loron ‘istóriku, importante, no determinante ne’e’, sei selebra iha aldeia Maquelab suku Taiboko sub-rejiaun Pante Makasar.
“Komemorasaun ba tinan ne’e ita konsentra iha suku Taiboko, akumula suku 20 no entidade relevante sira, ho orsamentu atu utiliza iha komemorasaun ne’e rihun $8, kolokadu ba seksaun sira hotu,” Prezidente Komisaun Organizadora, Salvadór da Cruz ba Ajénsia TATOLI,I.P iha Oekusi, ohin.
Atuál Sekretáriu Rejionál ba Asuntu Administrasaun no Finansa ne’e, informa, atividade prinsipál sira-ne’ebé integra iha komeorasaun loron Konsulta Populár ne’e maka hanesan:
Iha loron sábadu 29 Agostu lorokraik tuku 03:00, sei organiza marcha da paz (long-mars) la’o ain, hahú husi Tula-Ika suku Lifau ba to’o eis-merkadu Maquelab suku Taiboko, no sei kontinua kedan abertura ba kalan reflesaun, ho oradór sira mai husi Governu Sentrál reprezenta husi Ministra MSSI, Veronica das Dorres, Autoridade RAEOA reprezenta husi Prezidente Autoridade RAEOA, Régio da Cruz Salu.
Nune’e mós husi oradór husi Konsellu Veteranu Oekusi, parte juventude rezisténsia feto no mane, no mós oradór ida husi parte akadémika.
“Kalan reflesaun hotu maka foin tama ba sunu ahi, no loke filmajén ba akontesimentu loron Konsulta Populár 30 Agostu 1999 nian, no ikus halo konvivíu sei aprezenta kantiku no dansa kulturál sira. Iha domingu 30 Agostu, oras tuku 09;00, sei hala’o misa agradesimentu kontinua kedas ba suni lilin no kari ai-funan,” nia hateten.
Entretantu, kona-ba preparasaun, nia dehan, antes loron tolu, Komisaun Organizadora fahe konvite ba suku 20 no entidade relevante sira, hanesan veteranu, igreja, sosiedade sívil no seluktan.
Notísia relevante:Xanana: Komemorasaun Loron Konsulta Populár reflete povu nia moris no harii dame
Jornalista: Abílio Elo Nini
Editór: Rafael Ximenes de A. Belo
