MJDAK husu UE atu fó apoiu ba programa emprendedorizmu dijitál

DILI, 28 Agostu 2026 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, husu Uniaun Europeia (UE) atu fó apoiu ba programa emprendedorizmu dijitál ba foinsa’e sira iha Timor-Leste, tanba konsidera programa ne’e iha potensialidade boot atu dezenvolve kriatividade ekonómika foinsa’e sira-nian.

Pedidu ne’e hato’o bainhira hala’o reuniaun kortezia ho Embaixadór UE ba Timor-Leste, Thorsten Bargfrede, akompaña husi Sekretáriu Estadu Arte no Kultura (SEAK), Jorge Soares Cristóvão no Asesór Gil da Costa, iha edifísiu MJDAK, Lecidere, Dili, sesta ne’e.

Ministru Juventude, Desportu, Arte no Kultura (MJDAK), Nelyo Isaac Sarmento, hateten apoiu ne’e importante tebes hodi fó oportunidade ba foinsa’e sira atu dezenvolve abilidade dijitál no ekonomia kriativa.

“Ami husu apoiu UE nian iha área emprendedorizmu dijitál ba foinsa’e sira no mós dezenvolvimentu setór desportu, arte no kultura, tuir prioridade sira iha Planu Médiu Prazu MJDAK ba 2027-2030 nian,” Ministru Nelyo hateten.

Nia akresenta, enkontru ne’e nu’udar pasu importante hodi hametin kooperasaun bilaterál entre Timor-Leste no UE, no espera UE bele apoiu dezenvolvimentu portofóliu ministériu nian tuir kapasidade rekursu no prioridade estratéjika UE nian.

Jornalista : Hortêncio Sanchez

Editór       : Cancio Ximenes