Sentru Saúde Mentál San Bento Meni atende pasiente to’o na’in-80

BOBONARU, 28 Agostu 2026 (TATOLI) – Sentru Saúde Mentál San Bento Meni iha Maliana, munisípiu Bobonaru, iha kada fulan atende pasinete ho moras mentál entre na’in-70 to’o 80, liuhusi servisu konsulta, vizita domisiliária no akompañamentu iha komunidade.

Diretora Sentru Saúde Mentál San Bento Meni, Madre Maria Isal da Costa Martins, hatete sentru ne’e funsiona loroloron, ne’ebé simu no akompaña ema ho moras mentál, liuliu sira ne’ebé presiza kontinua hetan atensaun atu prevene moras.

“Jeralmente, kada fulan ami halo konsulta ba ema na’in-70. Ami halo vizita domisiliária no mós konsulta, entaun númeru aproximadamente entre 70 to’o 80. Konsulta foun, ema ne’ebé mai primeira vez bele haat ka lima iha kada fulan, no maioria mak konsulta repetida”, Madre Maria dehan ohin.

Nia esplika katak sentru ne’e la fornese internamentu permanente, maibé fó konsulta, akompañamentu no reabilitasaun ba ema moras mentál atu ajuda sira mantein kondisaun estavel no evita moras kona filafali.

Iha sentru ne’e, Madre Maria dehan ema moras sira hetan oportunidade atu partisipa iha atividade reabilitasaun hanesan halo krús, halo pontu krús, jardinajen no atividade seluk ne’ebé bele ajuda sira okupa tempu no dezenvolve kapasidade.

Sentru Saúde Mentál San Bento Meni mós fó konsulta psikolójika no psikiatria, no aposta barak liu ba formasaun no tratamentu iha komunidade. “Ami mós servisu iha komunidade. Ami bá Atabae, Balibó, Kailaku no Bobonaru atu akompaña ema moras no ajuda família. Ami hanorin família atu akompaña ho di’ak iha uma”, nia hatete.

Madre subliña katak modelu tratamentu komunitáriu importante tebes, tanba permite família kontinua akompaña ema moras, diferente ho modelu antigu ne’ebé dalabarak ema moras tenke tama iha ospitál psikiátriku durante tempu naruk no família balun la kontinua fó akompañamentu.

“Agora modelu komunitáriu di’ak liu tanba família kontinua akompaña ema moras. Ne’e fásil liu atu sira rekupera no mós hamenus estigma”, nia dehan.

Sentru ne’e mós realiza formasaun hamutuk ho família iha suku no aldeia, tanba familia nia papél importante tebes atu asegura ema moras kontinua tuir tratamentu.

Tuir nia, ema moras balun abandona tratamentu bainhira sira hahú sente di’ak, tanba la komprende katak tratamentu ba moras mentál presiza kontinuidade durante tempu naruk.

“Wainhira sira kalma no sente di’ak, família balun hanoin katak bele para tratamentu. Maibé, importante atu kontinua hemu ai-moruk tuir rekomendasaun atu mantein situasaun kontrolada”, nia hatete.

Madre Maria dehan ho tratamentu no akompañamentu ne’ebé adekuadu, ema moras mentál barak bele hetan kondisaun estavel no kontinua moris normál iha komunidade.

Hodi salienta katak bainhira família buka ajuda sedu ba ema ne’ebé hahú hatudu sinál moras, oportunidade atu hetan kontrolu no rekoperasaun di’ak liu.

Maski nune’e, sentru ne’e sei hasoru dezafiu balun, liuliu falta medikamentu, pesoál kualifikadu no transporte atu suporta servisu vizita no akompañamentu iha área komunidade.

Sentru ne’e seidauk iha médiku espesialista psikiatra permanente, tanba pesoál espesialista maioria konsentradu iha Dili. “Difikuldade seluk mak falta transporte. Ami iha karreta ida de’it, enkuantu tenke servisu no halo akompañamentu iha área komunidade”, nia dehan.

Iha tempu hanesan, nia konsidera katak difikuldade ekonomia no falta kompriensaun husi família balun kona-ba importánsia reabilitasaun mós sai hanesan dezafiu ba sentru ne’e.

Sentru Saúde Mentál San Bento Meni hetan apoiu husi Ministériu Saúde, Ministériu Solidariedade Sosiál no Inkluzaun, no kongregasaun husi rai-li’ur. Servisu hotu ba ema moras mentál iha sentru ne’e gratuita no pasiente la presiza selu osan.

Notísia relevante: Bobonaro iha ona Sentru Saúde Mentál

Atualmente, sentru ne’e iha rekursu umanu ne’ebé kompostu husi enfermeira, tekniku, motorista, traballadór reabilitasaun, pesoál dapur no limpeza, no madre sira, inklui pesoál ho espesialidade iha área psikiatria no psikolojia.

Estabelesimentu sentru saúde mentál ne’e nu’udar esforsu madre kongregasaun Irmã Hospitaleiras Sagrado Coração de Jesus, ho objetivu atu fó asisténsia saúde ba ema-neʼebé ho problema defisiénsia mentál.

Fatin ne’e sei sai mós oportunidade kona-ba importánsia kuidadu moras mentál ho forma atu promove integrasaun sosiál, nomeadamente sei ajuda mós ema hotu-hotu iha família no sosiedade.

Notísia relevante: Komunidade husu CSSI Bobonaru fasilita tratamentu saúde ba ema ho defisiente mentál iha Laklubar

Jornalista: Sergio da Cruz

Editora: Maria Auxiliadora