MALIANA, 02 agustu 2023 (TATOLI) – Autoridade Munisipá Bobonaro no Servisu Saúde Munisipál, kuarta ne’e halo inaugurasaun ba sentru Saúde Mentál São Bento Meni, iha suku Lahomea ne’ebé lokaliza iha área Igreja Parókia Maliana.
Estabelesimentu sentru saúde mentál ne’e nu’udar esforsu madre kongregasaun Irmá Hospitaleiras Sagrada Coração de Jesus, ho objetivu atu fó asisténsia saúde ba ema-ne’ebé ho problema defisiénsia mentál.
Notísia relevante: Klibur Domin Fó Tratamentu ba Ema Moras Mental ho Defisiénsia
“Sentru ne’e sei fó konsulta emfermajen, mxigatria,msikolojia, ezame-neorolojiku, eleito-defalograma no servisu sosiál sira, iha mós aktividade terapeútika, labor teurapia, ba kualkér ema-ne’ebé hasoru difikuldade sikolika no komportamentu,” Dirtora Sentru Saúde Mentál São Bento Meni, Irmá Andrea Calvo, hateten iha diskursu.
Fatin ne’e sei sai mós oportunidade kona-bá importánsia kuidadu moras mentál ho forma atu promove integrasaun sosiál, nomeadamente sei ajuda mós ema hotu-hotu iha família no sosiedade.
Madre Andrea hatutan, sentru saúde mentál ne’e mós sei regularmente sei realiza konsulta externa ba postu saúde Lima iha Munisípiu Bobonaro hanesan Cailaco, Bobonaro, Atabae, Balibó no Maliana.
“Sentru saúde ne’e sei nakloke ba públiku hahú hosi loron-segunda to’o sesta feira, pasiente sira sei akompaña hosi ekipa multi-profisionál ne’ebé haree ba kuidadu psikiatria,” nia katak.
Diretór Servisu Munisipál Bobonaro, João Cardoso, parabeniza Irmá Hospitaleiras sira-ne’ebé durante ne’e halo esforsu maka’as to’o ohin loron governu Timor-Leste legaliza ona sentru saúde mentál ne’e hodi kontribui fó atendimentu saúde ba sidadaun defisiénsia mentál sira.
“Pontu importante liu mak Ministériu Saúde posiblidade atu apoia profisionál saúde, médiku, enfermeiru, aliadu saúde bele koloka iha-ne’e atubele halo atendimentu ba ita-nia maluk defisiénsia mentál sira, maibé ne’e depende ba polítika Governu nian,” nia hateten.
Diretór Nasionál Promosaun ba Ema ho Defisiensia iha Ministériu Solisdariedade Sosiál no Inkluzaun, Mateus da Silva, konsidera estabelesimentu sentru saúde mentál ne’e sei ajuda governu minimiza kazu moras defisiénsia mentál iha Timor-Leste espesialmente munisípiu Bobonaro.
“Ita iha ona sentru saúde mentál rua ida iha Laklubar no São Bento, ita espera bele fó tulun ita-nia maluk sira ho kondisaun defisiénsia mentál, tanba sira mós bele sai ema importante ba nasaun no bele asesu ba aspetu dezenvolvimentu hotu,” Diretor ne’e akresenta.
Viagariu Jerál Dioseze Maliana, Padre Lúcio Norberto, husu Governu atu tau atensaun sentru saúde ne’e atu nune’e bele mellora kualidade atendimentu.
“Fatin ida-ne’e importante, maibé ita haree nia kondisaun sei mínimu, ita-nia governu presiza haree tanba ne’e ba interese komún, atu ita-nia ema ho defisiénsia mentál bele hetan asisténsia iha fatin ne’ebé di’ak liután,” Padre ne’e fó hanoin ba Governu.
Sekretáriu Autoridade Munisípál Bobonaro, João de Fátima do Carmo, promete sei kontinua koopera no kolabora ho parte hotu atubele kria kondisaun ba sentru saúde ne’e.
“Ita hakarak ba futuru atendimentu públika ba ita-nia populasaun sira bele di’ak liután, tanba faze parte ida madre sira, igreja bele hakmaan no tulun ona governu hodi fasilita ita-nia komunidade sira ne’ebé ho kondisaun defisiénsia mental,” nia akresenta.
Notísia relevante: Estoke ai-moruk ba ema ho defisiénsia mentál menus iha HNGV
Jornalista: Sérgio da Cruz
Editór: Evaristo Soares Martins
