DILI, 13 jullu 2022 (TATOLI)— Diretora Servisu Apoia Diagnóstiku no Terapéutika iha Hospitál Nasionál Guidu Valadares (HNGV), Mingota da Costa Herculano, informa estoke ai-moruk ba ema ho defisiénsia mentál hahú menus, nune’e difikulta atendimentu saúde ba pasiente sira.
“Ai-moruk ba ema ho defisiénsia mentál hanesan Fluphenazine, Haloperidol no Clorpromazina, daudaun menus iha HNGV no sai problema ba pasiente sira bainhira mai halo tratamentu saúde iha ne’e,” Diretora ne’e hateten ba Agência TATOLI iha kna’ar fatin Bidau, kuarta ne’e.
HNGV submete ona pedidu distribuisaun ba Servisu Autónomu Medikamentu no Ekipamentu Saúde (SAMES), maibé seidauk iha resposta.
“Ai-moruk hirak ne’e, atu sosa tenke liuhosi SAMES, nune’e HNGV labele kompra rasik iha klínika privadu sira,” nia afirma.
Alende ne’e, Diretora ne’e hatutan HNGV mós menus estoke ai-moruk vitál no konsumuvél tipu hamutuk 100, nune’e fó impaktu tebes ba pasiente sira ne’ebé mai halo tratamentu iha ne’e.
“Ami halo ona pedidu ba (SAMES), maibé resposta katak medikamentu ho kontentór balun foin tama, nune’e parte tékniku sei halo verifikasaun no inspesaun, hafoin distribui mai,” nia afirma.
Nia hatutan, “Ita hein katak SAMES bele distribui iha tempu badak, tanba iha fulan juñu ita haruka ona pedidu ba SAMES no konsege distribui mai, maibé hahú menus fali,” nia Nia esplika.
Hatan ba kestaun ne’e, Diretór Ezekutivu Servisu Autónomu Medikamentu no Ekipamentu Saúde, Santana Martins, hateten iha Orsamentu Jerál Estadu (OJE) 2022 prevee $250.000 hodi halo akizasaun ba medikamentu ba ema ho defisiénsia moras mentál.
“Ita loke konkursu públiku iha fulan-marsu 2022 atu ba halo akizasaun ba ai-moruk tipu 13, nune’e foin asina kontratu iha juñu ho kompaña Quilaban hosi Portugál no 3D life hus Sri Lanka, ne’ebé ai-moruk sei to’o iha Agostu,” nia kompromete.
Jornalista: Felicidade Ximenes
Editór : Florencio Miranda Ximenes
