Atraza nomeasaun, Diresaun edukasaun rejionál Oekusi suspende programa ‘esensiál’ rua
OEKUSI, 31 Agostu 2026 (TATOLI) – Diresaun Rejionál Servisu Edukasaun, Rejiaun Administrativa Espesiál Oekusi Ambeno (RAEOA), deside suspende programa ‘esensiál’ rua hanesan Programa Merenda Eskolár no Programa Konseisaun Eskolár.
Diretór Diresaun Rejionál Servisu Edukasaun Oekusi, Vincêncio Cono, informa katak programa rua ne’e sofre suspensaun tanba atraza iha nomeasaun tuir méritu ba xefe departamentu rua iha iha servisu edukasaun Oekusi.
“Ita hotu observa Programa Merenda Eskolár no Fundu Konseisaun Eskolár paradu, hein katak pauza de’it, maibé kuandu paradu totál, ne’e implikasaun inkompletu estrutura edukasaun nian. Ami iha xefe departamentu rua; ida, atu haree ba programa edukasaun, ida haree kona-ba jestaun parte eskolár sira no dezenvolvimentu iha diresaun,” nia hateten, ohin.
Prosesu administrativu no impaktu ba eskola sira
Tuir enkuadramentu legál estatutu autonomia rejionál nian (Lei N.º 3/2014, altera husi Lei N.º 15/2023 – Estatutu Espesiál RAEOA), ezekusaun orsamentál no transferénsia públika sira presiza validasaun husi estrutura administrativa ne’e nian.
Parte Edukasaun RAEOA submete ona pedidu nomeasaun ne’e husi loron 07 Maiu 2026, no hetan ona autorizasaun no aprovasaun husi Prezidente Autoridade RAEOA iha loron 25 Maiu 2026. Maibé, to’o ohin loron prosesu nomeasaun finál ne’e seidauk públika iha Jornál Repúblika, nune’e impedidu husi pontudevista legalidade administrativa atu fó kompeténsia ba signatáriu nian.
Implikasaun husi impase administrativu ne’e lori efeitu diretu ba kalendáriu eskolár tinan-2026, inklui preparasaun ba ezame sira.
“Implika mós ba pedidu sira hanesan Programa Merenda Eskolár no Programa Orsamentu Konseisaun Eskolár no sei fó impaktu ba ezame períodu datoluk pasajen klase no sei implika mós ba atividade kulminante ka alvu liu ba ezame nasionál no ezame lokál,” diretór edukasaun ne’e subliña.
Ezekutivu ne’e afirma mós katak, husi parte téknika edukasaun nian, dokumentasaun no pedidu hotu-hotu prontu ona. Maibé, parte servisu finansa no jurídiku autoridade rejionál nian halo hela analiza hodi liberta orsamentu transferénsia públika ba konta bankária eskola sira-nian, tanba legalmente, ejize asinatura legal husi Xefe Departamentu kompetente sira.
Desentralizasaun no MoU
Atu garante efisiénsia servisu no rezolve kestaun jeográfika RAEOA nian ne’ebé dook husi Kapitál Dili, Diresaun Edukasaun planeia atu selebra no hametin kooperasaun ho Ministériu Edukasaun (ME).
Nia hateten, servisu edukasaun tuir diploma ministeriál, prefere tenke iha xefe departementu rua maibé se ba futuru maka kargu rua ne’e estebelese ona, ita planu atu aprosima nafatin Prezidente Autoridade RAEOA ho Ministériu Edukasaun hodi selebra MoU (Memorandum of Understanding) ida liliu ba seksaun sira atu apoia xefe departementu na’in-rua tanba RAEOA jeografikamentu dook husi Dili.
Notísia relevante:Governu garante implementasaun ekitativu ba programa merenda eskolár iha eskola hotu
Jornalista: Abílio Elo Nini
Editór: Rafael Ximenes de A. Belo
