Autoridade RAEOA kompromete moderniza monumentu Masakre Maquelab
OEKUSI, 31 Agostu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Servisu Edukasaun ambisiona atu moderniza monumentu Masakre Maquelab –‘monumentu sangrante no istóriku’ tanba kauza ba ukun rasik aan, ne’ebé lokaliza iha suku Taiboko sub-rejiaun Pante Makasar.
“Semana oin, ita lori redi no bele mós halo konstrusaun ida hodi ita halo hale’u tiha, no kuda ai-funan no ai-oan barak, nune’e fatin istóriku ba monumentu ne’e bele buras,” Régio da Cruz, kompromete, iha ámbitu seremónia komemorasaun loron Konsulta Populár 30 Agostu iha aldeia Maquelab hamutuk ho família sobrevivente sira hala’o ho misa no kari ai-funan, ba dala-27, ne’ebé akontese iha loron 20 Outubru 1999.
“Fatin ne’e istóriku tanba maluk maluk Atoni-oan na’in-13 mate iha fatin ne’e, tanba ne’e ita tenki hadi’a fatin ne’e, sai furak no ba futuru bele sai mós fatin turízmu ida,” Prezidente Autoridade RAEOA ne’e akresenta.
Xefe aldeia Maquelab, Tarcizio Sonet apresia ho inisiativa ne’e, tanba fatin istóriku ne’e, Governu presiza konsidera atu moderniza sai di’ak liután.
“Ami kontente, kuandu Governu haakarak hadi’a, tanba fatin uluk ita-nia maun alin na’in-13 mate; milísia sira mak oho iha fatin ne’e. Entaun, sira-nia monument presiza halo lutu hale’u, nune’e ema no animál labele tama sai, ne’ebé ami espera bele realiza tanba ohin ami rona rasik atu hadia” nia hateten.
Notísia relevante:Gradualmente, Konstrusaun monumentu Masakre Bobo-Ufe Tumin hatudu progresu
Entretantu, martir na’in-13 ne’ebé mate iha loron 20 Outubru 1999 mak hanesan, Yohanes Talias, Domingos Fone, Mateus Ton, Gradus Elo, Marculino Fone, António Beno, Luís Palat, Ernesto Elo, Justilio da Costa, Paulos Quelo, Paulos Cusi, Domingos Quelo no Francisco Taek.
Notísia relevante:Empreza hahú konstrui Monumentu Masakre Tumin iha Oésilo
Jornalista: Abílio Elo Nini
Editór: Rafael Ximenes de A. Belo
