Gradualmente, Konstrusaun monumentu Masakre Bobo-Ufe Tumin hatudu progresu

OEKUSI, 25 Agostu 2026 (TATOLI) –Konstrusaun monumentu Masakre Tumin, iha suku Bobometo sub-rejiaun Oésilo Rejiaun Administrativa Espesiál Oekusi Ambeno (RAEOA), nia progresu fizíku atinje ona 25%.

Diretór empreza kontratora, Agustinho Colo Batan, esplika katak husi progresu 25% ne’e, kobre hotu uma lima kuaze tama ona hada tizolu (batako). Projetu ne’e iha uma lima inklui kapela ida. Nia fundasaun sira hotu ona. Enkosta inferiór (sloof bawah) mós hotu ona. Agora hada tizolu atu tama ba enkosta superiór (sloof atas), hela de’it asna telladu (kuda-kuda) hodi taka zinku, depois kontinua pinta jestu (plester cat), tetu (plafon) no monta kerámika.

“Hela de’it portaun maka seidauk hahú, ne’ebé agora ita hahú iha laran ikus maka nia portaun,” nia hateten iha Oekusi, ohin.

Notísia relevante:Konkursu konstrusaun semitériu Masakre Tumin loke ona, Empeza sira bele konkorre

Iha biban ne’e, Xefe Suku Bobometo, José Labi Caet, observa, projetu Masakre Bobo-Ufe Tumin, agora dadaun ne’e servisu kontinua la’o no nota katak besik atu taka zinku ona.

“Ha’u mós rona ona preokupasaun husi kompañia. Ne’ebé, ha’u rekomenda ba Governu liliu Autoridade RAEOA atu prosesa mós pagamentu 50% ba kompañia, nune’e bele iha forsa atu kontinua finaliza lalaís obra ne’e, tanba tuir planu obra ne’e termina iha tinan ne’e,” nia rekomenda.

Notísia relevante:Presiza harii ponte hodi fasilita movimentasaun bá semitériu masakre Bobo-Ufe Tumin  

Diretór Servisu Rejionál Obra Públika, Remígio Nunu Sila, esplika, projetu ne’e nu’udar planu mestre pluri-anuál nu’udar fatin istóriku iha Oekusi.

“Ita kontinua ezekuta konstrusaun Masakre Tumin, ho kategória konstrusaun foun tinan -2026 nian, tanba Serbisu Rejionál Obra Públika Oekusi, prepara ona nia dezeñu master-plant, signifika projetu ne’e pluri-anuál, kada tinan aloka orsamentu atu finaliza konstrusaun ne’e, nu’udar fatin istória no valór ba Estadu ba matebian sira-neʼebé mate iha tinan-1999, tanba ne’e, autoridade tenke tau importánsia hodi implementa,” nia esplika.

Tuir nia, tuir planu tenke finaliza iha tinan ne’e, bazeia nia durasaun tempu ne’ebé determina ona, tanba faze dahuluk konstrui uluk kapela no jardím.

“Projetu ne’e dezeña iha 2025 ho kategória master-plant, signifika nia item serbisu, neʼebé tenki tau iha masakre ne’e, maka kapela, sei hadi’a mós jardin sai hanesan fatin destinu ba futuru, tenke sai fatin dignu nu’udar turizmu, nune’e bele hetan vizitante tantu rai-laran no rai-li’ur, hodi kontribui reseita ba kofre Estadu,” nia hateten

Notísia relevante:Ponte alternativa konstrui iha semitériu Masakre Tumin konkluídu

Entretantu, projetu ne’e implementa husi kompañia Kefi-Oel Unipesoál Lda, ho valór kontratu rihun $139,393.45 ho durasaun servisu fulan neen.

Jornalista: Abílio Elo Nini

Editór: Rafael Ximenes de A. Belo