CNRT apela ba povu atu apoia prosesu negosiasaun fronteira marítima entre Timor-Leste no Indonézia
DILI, 31 Agostu 2026 (TATOLI)-Xefe bankada Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, apela ba povu tomak atu kontinua fó apoiu ba delegasaun Timor-Leste ne’ebé halo negosiasaun fronteira marítima ronda dahaat ho Repúblika Indonézia.
Ronda dahaat negosiasaun fronteira marítima entre Timor-Leste no Indonézia sei hala’o iha Jakarta, iha loron 01 Setembru 2026.
Nia dehan katak luta país nian ba ukun-an ne’e mak soberania tomak tenke kompletu, sai identidade nasaun nian iha rai-maran, tasi no lalehan.
“Ida-ne’e mak prosesu la’o hela. Agora, Primeiru-Ministru iha hela Indonézia atu kontinua negosiasaun sira. Hein katak timoroan hothotu iha responsabilidade morál atu apoia polítika sira ne’e, hodi to’o iha objetivu finál mak tenke hetan delimitasaun fronteira ida definitiva entre Timor-Leste no Indonézia”, deputadu hato’o iha Parlamentu Nasionál, ohin.
Patricínio dehan katak apoi husi sidadaun hotu pertinente atu ajuda buka solusaun liuhusi prosesu negosiasaun, tanba delimitasaun fronteira marítima definiva sei kompleta soberania nasaun no sai parte ida husu prosesu konsolidasaun independénsia país.
Lembra katak, Primeiru-Ministru, Xanana Gusmão, ho delegasaun, iha 29 Agostu ne’e, dezloka ona bá Indonézia atu kontinua halo negosiasaun kona-ba delimitasaun fronteira marítima entre país rua.
Ronda datoluk negosiasaun fronteira marítima entre nasaun rua hala’o ona iha Singapura, entre 27 no 29 Abríl, ne’ebé marka prosesu avansu importante ida iha prosesu negosiasaun.
Husi rezultadu negosiasaun ne’e, parte rua konkorda atu kontinua prosesu ba ronda dahaat, ne’ebé desididu atu hala’o iha Indonézia, iha Agostu 2026.
Notísia relevante: Xanana dezloka bá Indonézia kontinua negosiasaun ronda dahaat fronteira marítima
Jornalista: Nelson de Sousa
Editora: Maria Auxiliadora
