Governu garante seguransa ba serimónia fúnebre restu mortal Bispu na’in-haat sei la’o ho di’ak
DILI, 31 Agustu 2026 (TATOLI) – Governu liuhusi Ministru Interiór (MI) Francisco da Costa Guterres, fó-sai katak, prosesu simu no fúnebre ba restu mortál Amu Bispu na’in-haat sei la’o ho di’ak, tanba garante seguransa másimu husi PNTL no F-FDTL.
Governu hamutuk ho igreja liuhusi Konferénsia Episkopál Timorense (CET) deside atu haloot restu mortál Bispu na’in-haat iha Igreja Katedrál tuir sekuénsia Estadu nian ne’ebé koordenadu ona ho parte CET iha loron (10/9).
Restu mortál Amo Buspu na’in-haat mak hanesan; Bispu Dom Jaime Garcia Goulart, Bispu Dom Joaquim Ribeiro, Monseñor Martinho Costa Lopes no Bispo Dom Alberto Ricardo da Silva, ne’ebé tuir planu sei halo hamutuk iha Igreja Katedrál Dili liuhusi misa boot iha Tasi – Tolu iha loron (10/9) molok ba haloot.
Nune’e agora dadaun tuir ajenda ne’ebé iha katak restu mortál Amo Bispu na’in-tolu hanesan Bispu Dom Jaime Garcia Goulart, Bispu Dom Joaquim Ribeiro, Monseñor Martinho Costa Lopes husi Bali to’o mai iha Dili iha loron tersa (01/9) no agora daudaun ne’e Governu hamutuk ho igreja hahú preparasaun másimu ba atu simu Bispu na’in-tolu nian.
“Garante, tanba ita tenke fiar ita-nia polísia no forsa, serimónia aban ne’e sei lao di’ak. Uluk Amu Papa mai de’it mós ita bele halo, nusá ida-ne’e ita labele halo, ita laiha proplema no ha’u sente laiha problema no ha’u mós fi’ar katak buat hotu sei la’o di’ak,” Ministru Interiór Francisco Guterres hafoin observa preparativu ekipa seguransa no forsa ba serimónia simu restu mortál Amu Bispu na’in-tolu iha aeroportu no serimónia fúnebre ba restu mortál Bispu na’in-haat, iha Tasi- Tolu, segunda ne’e.
Nia dehan, buat sira ne’ebé mak hanesan ema fakar oli iha dalan diresaun Tasi-Tolu mai Dili ne’e buat ki’ik ekipa bele rezolve.
“Ne’e problema ki’ik, ita sei buka tuir hotu, la’ós Polísia de’it, ita-boot sira mak hetan mós tenke fó hateten Polísia, autoridade lokál, ne’ebé kazu ne’e agora ekipa servisu hamutuk ho autoridade lokál atu haree buat sira-ne’e,” nia afirma.
Governante ne’e husu komunidade tomak inklui joven sira hotu ita tenke presta omenajen ba preladu sira.
“Ita tenke asegura nune’e lao di’ak, hatudu katak ita fó onra duni Amo Bispu na’in-haat ne’e tanba sira mos fó sira-nia aan ba serbí ita-nia rai. Liuliu Dom Martinho ne’ebé mak alende haree ba kestaun relijiaun, mas haree mós ba ita-nia ukun aa ne’e,” nia fó hanoin.
“Ita hotu tenke tau hamutuk neon katak restu mortál mai ona, mai ita presta omenajen ne’e ho di’ak ba sira na’in-haat.”
Governate ne’e dehan, Polísia ho forsa daudaun ne’e halo hela simulasaun oinsa simu restu mortál Amu Bispu na’in-tolu iha aeroportu hafoin lori ba Tasi Tolu no ikus liu haloot sira iha fatin deskansa ikus nian.
Notísia relevante: PNTL hatún efetivu rihun-ida asegura transladasaun restu mortál Bispu na’in-tolu
Jornalista: Natalino Costa
Editór: Evaristo Soares Martins
