PNTL hatún efetivu rihun-ida asegura transladasaun restu mortál Bispu na’in-tolu

DILI, 31 Agustu 2026 (TATOLI) –  Komandante PNTL Munisípiu Dili, Komisáriu Asisténte Polísia Orlando Gomes, fó-sai katak, komandu prepara efetivu rihun-ida asegura serimónia transladasaun Amu Bispu na’in-tolu husi rai li’ur mai Timor -Leste.

Amu na’in-tolu nia restu mortál mak hanesan Dom Jaime Garcia Goulart, Bispu Dom Joaquim Ribeiro no Monseñor Martinho Costa Lopes sei to’o iha Aeroportu Internasionál Nicolau Lobato iha loron (01/9), nune’e PNTL prepara efetivu husi Munisípiu Dili na’in 400-resin hetan apoiu husi efetivu Unidade Espesiál, Kuartél Jerál, Unidade Polísia Marítima hodi apoia seguransa simu restu mortál hahú husi Aeroportu, Tasi Tolu, ba to’o Manatutu, lori fali mai Dili no to’o serimónia fúnebre.

“Komandu Munisípiu Dili ita hasai ona orden alerta 2 tanba ita mós iha 400-itál ho mós Unidade Espesiál Polísia ho tán Unidade Maritima ho Kuartél Jerál ita bele dehan katak ita bele hatún efetivu 1000 hanesan ne’e atubele asegura ita-nia situasaun seguransa,” Orlando Gomes hateten ba jornalista sira hafoin dirije parada jerál ba seguransa simu restu mortál Amu Bispu na’in-tolu husi rai-li’ur mak Dili ne’ebé halo iha Komandu PNTL, Kaikoli, segunda ne’e.

Nia dehan, iha operasaun seguransa ba serimónia ida ne’e la’ós polísia mesak maibé sei apoiu mós husi F-FDTL iha jestaun ne’e Polísia Mlitár sei apoiu hamutuk hodi halo eskolta asegura mós restu mortal.

“Tanba ne’e ita-nia membru sei barak, ita-nia planu operasaun ne’ebé iha sei asegura husi Dili ba to’o iha Manatutu, Laleia ne’e, ita sei asegura movimentu iha dalan ka rota ne’ebé ita define ona, ita sei asegura bainhira lori fila-fali mai mós seguru,” nia afirma.

Nia esplika, bazea ba planu operasaun ne’ebé mak atribui ba Komandu Munisípiu Dili nu’udar Komandu tatikál iha terrenu, tanba ne’e ohin realiza parada konjunta entre Munisípiu Dili komandu Unidade Espesiál Polísia ho Komandu Jerál.

“Ohin ita breafing ba iha planu operasaun tátiku ninian ba iha membru sira tomak ba komandante tátiku iha terrenu hotu atu nune’e sira tenke kumpre no responsabilidade ne’ebé mak iha liuliu ba planu seguransa atu nune’e ita bele asegura seguransa durante vizita ita nian testu mortál mai iha Dili to’o iha serimónia fúnebre,” nia informa.

Orlando hateten, iha planu operasaun nasionál termina tiha ona rute hahú husi Aeroportu, Tasi Tolu no mós movimetu ba fatin sira neebé mak terminadu husi programadu husi Igreja.

“Tuir planu katak dalan sira ne’ebé bainhira ita-nia restu mortál liu ita sei taka depois liu hotu loke normál hanesan bainbain. Ne’ebé movimentu transporte bele la’o maibé kuandu testu mortál liu ita sei taka,” nia dehan.

Nia dehan, restu mortál Biapu Dom Alberto Ricardo sei sai husi Maloa ba Tasi-Tolu, maibé movimentu Tum Tum sei iha ne’ebá nu’udar komandante Munisípiu Dili orienta ona ba iha komandante tránzitu atu agora kedan orienta ba iha Tum Tum, para iha Joao Paulo nian kotuk.

“Ita tenke dignifika ita-nia testu mortál ne’e, hanesan Dom Martinho nia ne’e erói,” nia afirma.

Orlando husu ba membru PNTL sira atu fó seguransa ne’ebé disiplina, kuandu fó seguransa tenke tau farda no tau aas interese estadu nian boot liu buat hotu, tane aas responsabilidade no proteje direitu sidadaun nian ida ne’e mak importante, hala’o tuir orden ne’ebé komandu fó.

Notisia relevante: PM Xanana simu restu mortál bispu na’in-tolu iha Bali no 1 setembru to’o Dili

Jornalista: Natalino Costa

Editór: Evaristo Soares Martins